Belarýs oppozitsiiasynyń jetekshisi Svetlana Tihanovskaia halyqty "Golos" chat-platformasynda bilikpen kelissóz júrgizý jóninde daýys berýge shaqyryp, arnaiy málimdeme jasady. Málimdemesinde ol ózin alǵash ret "belorýs halqy sailaǵan lider" dep atady, dep habarlaidy Azattyq.
Aitýynsha jalpyulttyq daýys berý anonimdi túrde ótedi.
"Elde daǵdarys bolyp jatqanyn bárimiz bilemiz. Ony tek beibit jolmen – halyqaralyq uiymdardyń aralasýymen ǵana sheshe alamyz. 25 naýryz aldynda Úilestirý keńesi, BYPOL, yntymaqtastyq qory jáne demokratiialyq ózge de kúshter birigip, "Golos" paltformasynda daýys berýdi bastaimyz. Siz ben bizdiń mindetimiz – árbir belorýs daýys beretindei etý. Sonda ǵana "Erik-jiger kúnine" qarai alǵashqy nátijesin kóremiz" dedi Tihanovskaia.
25 naýryz – Belarýste Erik-jiger kúni. Mereke 1918 jyldan beri bar. Beiresmi túrde keide "Táýelsizdik kúni" dep te atalady. Resmi táýelsizdik kúni – 3 shilde.
Oppozitsiia buǵan deiin halyqty osy 25 naýryz kúni mitingige taǵy shyǵýǵa shaqyrǵan.
Tihanovskaia sózinshe, Lýkashenko - "sailaýda jeńilip qalsa da, bilikti ustap otyrǵan adam" jáne "ol milliondaǵan belorýstyń betine túkirip, eldi kúshpen basqarmaq, qarsylyq aldynda kúsh qoldanbaq".
"Osy málimdemeni jasaýǵa jeti ai boiy sheteldik saiasatkerlermen, uiymdarmen jumys istedim jáne Belarýstegi shynaiy ahýaldy baiandadym, qoldaý taptym, qýatty ári kásibi komanda jinadym. Bári bizdi jaqtady. Endi osy kómekti paidalanatyn kez keldi. Sizderdiń daýystaryńyz EQYU men BUU-nyń tabandy sheshim shyǵarýyna, bizdiń soǵan qol jetkizýimizge járdemdesedi. Olar júieni kelissózge kóndirýge, oryn usynýǵa jáne deldal bolýǵa daiyn" dedi ol.
Svetlana Tihanovskaia 2020 jyly tamyzda prezident sailaýyna qatysqan. Táýelsiz baqylaýshylar men oppozitsiialyq toptar onyń jeńiske jetkenin aitqan. Biraq Ortalyq sailaý komissiiasy jeńis eldi 26 jyldan beri bilep kele jatqan Aleksandr Lýkashenko jaǵynda ekenin málimdegen. Budan soń Belarýste halyq narazylyǵy bastaldy. Júz myńdaǵan turǵyn qys túskenshe Minsk kóshelerinde beibit sherý uiymdastyrdy. Politsiia demonstranttardy kúshpen basyp-janshydy. Qysta kóshedegi qarsylyq saiabyrlap qalǵanymen tolyq toqtaǵan joq.
"Eýropadaǵy sońǵy diktator" deitin beiresmi ataǵy bar Aleksandr Lýkashenko qyzmetin tapsyrǵysy kelmeidi. "Ólsem de bilikten ketpeimin" dedi. Ony Batys elderi prezident dep moiyndamaidy.
