Oman memleketiniń «Salam Air» áýe kompaniiasy el astanasy Maskattan Almatyǵa jáne Nur-Sultanǵa reister ashady, dep habarlaidy "Ult aqparat" QR Indýstriia jáne infraqurylymdyq damý ministrligi Azamattyq aviatsiia komitetine silteme jasap.
QR Prezidentiniń halyqaralyq reister sanyn kóbeitý jónindegi tapsyrmasyna sáikes, Qazaqstan Respýblikasy men Oman Sultanatynyń aviatsiialyq biligi arasynda ekijaqty kelissóz júrgizilgen. Qazaqstandyq delegatsiiaǵa QR IIDM Azamattyq aviatsiia komitetiniń tóraǵasy Talǵat Lastaev, al Oman delegatsiiasyna Oman Sultanatynyń Kólik jáne kommýnikatsiialar ministrligi Áýe kóligi departamentiniń direktory Salim ál-Hýsseini basshylyq etken.
«Kelissózder nátijeleri boiynsha áýe reisteri úshin quqyqtyq baza quryldy. Oǵan sáikes, eki eldiń taǵaiyndalǵan tasymaldaýshylaryna aptasyna 14 jolaýshy jáne 14 josparlanǵan júk reisin oryndaý quqyǵy berildi. Osy negizde, kelesi jyldyń naýryz aiynda omandyq «Salam Air» áýe akompaniiasy «Almaty – Maskat» (Oman astanasy) baǵyty boiynsha aptasyna 7 ret reis jasaityn ushaq ushyrady. Sondai-aq, kelesi jyldyń kúzinen bastap joǵaryda atalǵan Oman áýe akompaniiasy «Nur-Sultan-Maskat» baǵyty boiynsha áýe qatynasyn jolǵa qoimaq», - delingen habarlamada.
Bul jumys Oman Sultanaty azamattarynyń Qazaqstan Respýblikasynda 30 kún vizasyz bolý tártibiniń engizilýimen (2019 jyldyń 30 qyrkúieginen bastap kúshine engen) bir mezgilde júrgizilýde.
Atap ótilgendei, eki el arasynda tikelei reisterdiń ashylýy, sondai-aq Qazaqstanda engizilgen vizasyz rejim jáne qolaily klimattyq jaǵdailar Oman Sultanaty azamattaryna týrist retinde Qazaqstanǵa kelýine jol ashady.
Sonymen birge, Oman tarapy óz kezeginde Qazaqstan Respýblikasynyń azamattary úshin vizasyz rejimdi engizýdi qarastyryp jatyr.
