Densaýlyq saqtaý ministri Eljan Birtanov meningitten vaktsinatsiialaýǵa qatysty pikir bildirdi, - dep habarlaidy "Ult aqparat".
"Normativtik-quqyqtyq bazamyzǵa sáikes, vaktsinatsiia boiynsha sheshimdi juqpaly arýlar boiynsha ulttyq koordinatsiialyq konsýltativtik komiteti shyǵarady. Otyrys bir apta buryn ótken, oǵan infektsionister men epidemiologtar endi. Olar vaktsinatsiia engizý máselesin qazir erte jáne meningit boiynsha vaktsinatsiia júrgizýdi ulttyq kúntizbege engizýge qajettiligi joq degen sheshim shyǵardy. Bul tiimsiz ári shyǵyny kóp shara bolar edi. Meningitke qarsy jappai vaktsinatsiialaýdy bastaýdyń qajeti joq, onyń kómegi bolmaidy. Sebebi, ol tek eki úsh aidan keiin nátije bere bastaidy. Al bizde bul infektsiia búginde júrip jatyr, sondyqtan qaitalap aitamyn, onyń kómegi bolmaidy. Jalpy, bizde Dúniejúzilik densaýlyq saqtaý uiymynyń talaptaryna sai barlyq sharalar qolǵa alynyp, júrgizilýde. Tótenshe jaǵdai joq", - dep málimdedi ministr.
Odan bólek, ol aýrý juqtyrǵandardyń sany ortasha-baqylaýdaǵy deńgeide ekenin aitty.
E. Birtanovtyń aitýynsha, meningokk bakteriialarynyń túrleri úshin kóptegen vaktsinalar bar. Jalpy, olardyń ekeýi paidalanylyp keledi, qazirgi kezde onyń ishinde bireýi Qazaqstanda tirkelgen.
Ministrdiń atap ótýinshe, vaktsinalardy tirkeý farmatsevtikalyq kompaniialardyń ótinimi boiynsha iske asady. Qajet bolǵan jaǵdaida, bul preparattar birden kirgizilip, vaktsinalaý bastalady. «Aýrýǵa shaldyǵýdyń eki kezeńi bar. 100 myń turǵynǵa shaqqanda aptasyna úsh oqiǵa tirkelse, shtabtardy qurý bastalady.
Búginde bizde bul deńgei eki esege tómen. Iaǵni biz profilaktikalyq, aldyn alý sharalaryn erte bastadyq. Vaktsinalaý máselesi 100 myń adamǵa shaqqanda aýrýdyń 10 oqiǵasy tirkelgen kezde kóteriledi. Sáikesinshe, aýrýǵa shaldyǵý deńgeii jeti esege tómen. Sondyqtan vaktsinalaý sharalary boiynsha másele kóterilgen joq», - dedi E. Birtanov.
Sonymen qatar, buǵan deiin vedomstvo basshysy jyl basynan beri meningit juqtyrǵan 58 naýqastyń 12-si kóz jumdy dep habarlaǵan bolatyn.
Aita keteiik, meningit juqtyrǵan eń birinshi naýqas sáýirdiń 30 kúni tirkelgen.
