Qazaqstan Respýblikasynyń Shveitsariiadaǵy Elshiliginiń kómegimen jýyrda Almaty oblysynyń ákimi Amandyq Batalov bastaǵan delegatsiia Shveitsariianyń Tichino kantonyna jumys saparymen bardy. Bul sapar Qazaqstan - Shveitsariia óńiraralyq yntymaqtastyǵyna jańa serpilis beredi dep kútilýde.
Qazaqstan delegatsiiasynyń quramynda oblys ákimdiginiń, I.Jansúgirov atyndaǵy Jetisý memlekettik ýniversitetiniń, «Almaty oblysyn damytý boiynsha «Alataý» AQ, oblystyń kásipkerlik uiymdary ókilderi jáne «Jetisý» ÁKK» ulttyq kompaniiasynyń basshylyǵy da bar.
Sapar kantonmen saýda-ekonomikalyq, qarjy jáne ǵylymi-tehnikalyq yntymaqtastyq ornatýdy, Qazaqstandaǵy biznes júrgizýdiń jeńildetilgen sharttarymen tanystyrýdy, sondai-aq, keleshek yntymaqtastyqty keńeitý men jańa salalardy birlesip tabýdy maqsat etti.
Qazaqstannyń Shveitsariiadaǵy Elshiliginiń habarlaýynsha, Almaty oblysynyń ákimi A.Batalovtyń Tichino kantonynyń Prezidenti Manýele Bertolimen, Memlekettik kantsler Arnoldo Kodýrimen, Ekonomika jáne qarjy ministri Kristian Vittamen, Lýgano qalasynyń ákimi Marko Borradorimen, Tichino kantony bankiniń Direktorlar keńesiniń tóraǵasy Fabritsio Chislakvichpen, Qoldanbaly ǵylym men óner ońtústik Shveitsariianyń Ýniversitetiniń (SUPSI) Innovatsiia men zertteý departamentiniń orynbasary Janbatisto Ravanomen jáne 20-dan astam shveitsariialyq kompaniialar basshylarymen kezdesýleri ótti. Almaty oblysy delegatsiiasynyń músheleri Tichino kantonyndaǵy qoqysty qaita óńdeý boiynsha eń iri kásiporyn «Azienda Cantonale die Rifiuti», shokolad óndiretin «Chocolat Stella», energetika jáne aqparattyq tehnologiialar boiynsha «AVV» kompaniialarymen, sondai-aq Airolo qalasynda taý shańǵysy kýrorty, asyl tuqymdy siyr sharýashylyǵy jáne irimshik pen sút ónimderin shyǵaratyn zaýyttardyń jumysymen tanysty.
«Azienda Cantonale die Rifiuti» - Tichino kantonynyń qaldyqtardy tereń óńdeitin eń iri zaýyty, táýligine 100 tonna qaldyqty óńdep, 10 MVt energiia men 2 MVt-tan astam jylý qýatyn óndiretinin atap ótý qajet.
Tichino kantony basshylyǵymen kelissózder barysynda saýda-ekonomikalyq, bilim, ǵylym, týrizm, aýyl sharýashylyǵy jáne qarjy máselelerinde yntymaqtastyqty nyǵaitý jaiy talqylandy. Kantonnyń Prezidenti Manýele Bertoli Almaty oblysy men Tichino kantonynyń ekijaqty yntymaqtastyq úshin úlken áleýeti bar ekendigine jáne bul sapar onyń is júzinde júzege asyrylýyna yqpal etetinine erekshe kóńil aýdardy.
Qazaqstannyń Dúniejúzilik Saýda Uiymynyń jáne Eýraziialyq Ekonomikalyq Odaǵynyń múshesi bolýyna tiimdiligi, elimizdegi keń investitsiialyq preferentsiialar jáne biznes júrgizý úshin jeńildetilgen sharttary Shveitsariia isker toptarynyń arasynda erekshe qyzyǵýshylyq týdyrdy.
Ótkizilgen kezdesýlerdiń nátijesinde taraptar Almaty oblysyndaǵy investitsiialyq jobalardy júzege asyrý múmkindigin zertteýge, tájiribe almasýǵa, ásirese Ońtústik Shveitsariianyń qoldanbaly ǵylymdar jáne óner ýniversitetimen (SUPSI) bilim jáne ǵylym salasynda yntymaqtastyqty nyǵaitýǵa qol jetkizdi. Qazaqstan tarapy Kanton basshylyǵymen jergilikti isker toptaryn Almaty oblysyna issaparmen kelýge shaqyrdy.
Tichino kantony - Shveitsariianyń iri qarjy ortalyqtarynyń biri, sondai-aq munda aqparattyq-kommýnikatsiialyq tehnologiialar, bilim, týrizm, qurylys, máshina jabdyqtary, farmatsevtika men biomeditsina salalary damyǵan. JIÓ 28,6 mlrd. AQSh doll., halyqtyń jan basyna shaqqanda JIÓ 82,1 myń AQSh doll., al Shveitsariianyń JIÓ-ge úlesi 4,5% quraidy.
