Semei qalasynyń turǵyny Threads áleýmettik jelisinde qaldyrǵan pikirleri úshin eki jylǵa bas bostandyǵynan aiyryldy. Bul týraly Abai oblystyq sotynyń baspasóz qyzmeti habarlady, dep habarlaidy ult.kz.
Isti Semei qalasynyń qylmystyq ister jónindegi aýdanaralyq soty qaraǵan. Sot materialdaryna sáikes, sottalýshy shamamen bir jarym jyl boiy Threads áleýmettik jelisinde ózge qoldanýshylardyń din taqyrybyndaǵy jariialanymdaryna pikir jazyp kelgen.
Sottyń málimetinshe, ol jariialaǵan pikirler ulttyq jáne dini arazdyqty qozdyrýǵa, azamattardyń dinge kózqarasy men ulttyq tiesililigine bailanysty ar-namysy men qadir-qasietin qorlaýǵa baǵyttalǵan.
Sottalýshy óz kinásin tolyq moiyndap, bas bostandyǵynan aiyrýmen bailanysty emes jaza taǵaiyndaýdy suraǵan. Alaida memlekettik aiyptaýshy oǵan naqty merzimge bas bostandyǵynan aiyrý jazasyn qoldanýdy talap etti.
Nátijesinde sot er adamdy Qylmystyq kodekstiń 174-babynyń 1-bóligi («Áleýmettik, ulttyq, rýlyq, násildik nemese dini arazdyqty qozdyrý») boiynsha kináli dep tanydy.
Úkim shyǵarý kezinde sot sottalýshynyń shyn júrekten ókingenin, buryn sottalmaǵanyn, qylmystyq jaýapkershilikke alǵash ret tartylǵanyn, turǵylyqty jeri men jumys ornynan oń minezdeme berilgenin jeńildetetin mán-jai retinde eskerdi. Aýyrlatatyn mán-jailar anyqtalmaǵan.
Osynyń negizinde sot oǵan 2 jyl merzimge bas bostandyǵynan aiyrý jazasyn taǵaiyndady.
Aita keteiik, Qylmystyq kodekstiń 174-baby boiynsha kináli dep tanylǵandarǵa aiyppul salý, 2 jyldan 7 jylǵa deiin bas bostandyǵyn shekteý nemese dál osy merzimge bas bostandyǵynan aiyrý jazasy kózdelgen.
