Reseilik ǵalymdar "Spýtnik V" ekpesi synaqtyń úshinshi kezeńinen keiin 92 paiyz tiimdilik kórsetkenin málimdedi. Synaq qorytyndysy 2 aqpanda halyqaralyq The Lancet jýrnalynda jariialandy.
Jýrnaldaǵy zertteý qorytyndysynda bul ekpeniń qaýipsiz ekeni jáne ólim men aýyr dertten saqtaityny jazylǵan.
Resei biligi tamyzda "Spýtnik V" ekpesi synaqtyń úshinshi kezeńinen ótpei jatyp, qoldanýǵa ruqsat bergen edi. Sol kezde batys ǵalymdary bul ekpeniń tiimdiligine kúmán keltirgen.
Biraq ǵalymdar qazir "Spýtnik V" ekpesiniń paidasy dáleldendi dep málimdedi.
"Zertteý nátijesi taza. Koronavirýs indetimen kúreske taǵy bir vaktsina qosyldy" dep jazdy britaniialyq ǵalymdar Ien Djons pen Polli Roi.
Reseilik ekpe synaqtyń úsh kezeńinen ótip, tiimdiligin dáleldegen bes vaktsinanyń qataryna endi. Buǵan deiin Pfizer, Oxford/AstraZeneca, Moderna jáne Janssen ekpesi úshinshi synaq kezeńinen keiin koronavirýspen kúrese alatynyn kórsetken.
The Lancet jýrnalynyń jazýynsha, synaqqa 19866 erikti qatysqan. Onyń shirekgi platsebo, qalǵany ekpeni alǵan. Vaktsina saldyrǵan eriktilerdiń 16-syna, platsebo saldyrǵandardyń 62-ne virýs juqqan.
Qazaqstan 2 aqpannan bastap reseilik "Spýtnik V" ekpesin sala bastaǵan. Bul ekpe qazir Resei men Qazaqstannan bólek Argentina, Vengriia, Venesýela, BAÁ, Túrkimenstan, Iranda da salynyp jatyr.
"Spýtnik V" ekpesi eki dozadan turady. Ekinshi dozany 21 kúnnen keiin salý kerek.
