Foto: RIA Novosti © Aleksei Drýjinin
Jurt kózinshe soǵysty qoldaityn, batysty synap júrgen reseilik sheneýnikterdiń balalary shetelde, onyń ishinde NATO elderinde turaqty demalady. Bul jóninde olardyń balalarynyń áleýmettik jelidegi paraqshalaryn zerttegen The Insider basylymy jazdy, dep habarlaidy Azattyq.
"NATO Reseige qarsy gibrid soǵys júrgizip jatyr" dep jii aitatyn Resei syrtqy barlaý qyzmetiniń direktory Sergei Naryshkinniń qyzy Veronika Naryshkina keiingi kúnderi Túrkiia, Italiia, Grekiiada bolǵan. Buǵan qosa, Balide ár bólmesin jaldaý quny kúnine 500 dollar bolatyn qonaqúige toqtaǵan. Sol siiaqty Seishel araldary, BAÁ-de bolǵan.
The Insider aitýynsha, Veronika Naryshkina - sheneýniktiń otbasynyń ózge músheleri siiaqty áli sanktsiia tiziminde.
Resei federatsiia keńesiniń múshesi, FSB-nyń otstavkadaǵy general-maiory Vladimir Jabarovtyń uly 2021 jyly jazda Kaliforniiaǵa baryp demalǵan. Resei oppozitsiiasyn AQSh-tyń arnaiy qyzmetimen astyrtyn sóz bailasty dep aiyptaǵan sheneýniktiń uly Aleksandr Jabarov soǵys bastalǵannan keiin Shvetsiia, Norvegiia, Túrkiiada bolǵan.
Federatsiia keńesiniń spikeri Valentina Matvienkonyń bolashaq kelini soǵys bastalǵan soń Italiiadaǵy villada demalǵan. Al memlekettik dýma vitse-spikeri Aleksandr Jýkovtyń qalyńdyǵy bos ýaqytyn Grekiianyń Mikonos aralynda ótkizgen.
The Insider Resei qorǵanys ministri Sergei Shoigýdyń qyzy Kseniiaǵa bir bólim arnaǵan. Ýkrainanyń Donetsk oblysynda qyzý urys júrip jatqan shaqta Kseniia jańa jyl demalysyn Dýbaida ótkizgen. The Insider Kseniianyń kúieýimen birge toqtaǵan qonaqúiin anyqtap, erli-zaiypty demalysyna keminde 500 myń rýbl jumsaǵan bolýy múmkin degen tujyrym jasady.
