Resei prezidenti Vladimir Pýtinniń jarlyǵymen jariialanǵan "ishinara" mobilizatsiia boiynsha áskerge alynǵan, biraq alǵy shepke barýdan bas tartqan 21 adam Ýkrainanyń Donetsk oblysy Zavitne Bajannia kentindegi jertólege qamalǵan. Bul jóninde The Insider qamaýdaǵylardyń týystaryna siltep habarlady. Jaqyndarynyń sózine qaraǵanda, mobilizatsiialanǵandarǵa alǵy shepke barýdan bas tartqandardyń atylatyny eskertilgen, dep jazady Azattyq.
The Insider jertólede otyrǵandardyń biriniń áieli Elena Kashinanyń aty-jónin ashyq jariialaǵan. Onyń sózinshe, 33 jastaǵy kúieýi buryn áskerde bolǵan, biraq garajda BTR jóndeýmen shuǵyldanǵan, áskeri biletine de solai jazylǵan. Poligondaǵy daiyndyq kezinde avtomatpen bir-aq ret atqyzǵan, onda da jaramsyz avtomat bolyp shyqqan. Bir ret okop qazyp kórsetip, maidanǵa jibergen. Maidanda ózge jaýyngerlermen birge qarsylas shebin basyp alý úshin shabýylǵa qosqan. Biraq ol adam óltirgisi kelmeitinin aityp, buiryqty oryndaýdan bas tartqan.
Jertólede qamaýda otyrǵan ózge de adamdardyń týystarynyń sózine qaraǵanda, alǵy shepten bas tartqandarǵa tamaq ta, gigienalyq zattar da berilmeidi. Týystary Resei tergeý komitetine shaǵymdanǵanymen jaýap ala almaǵan.
The Insider málimetinshe, jertóledegi segiz adam mobilizatsiiadan buryn "Dalpolimetall taý-ken metallýrgiia kesheninde" jumys istegen. Qorǵanys kásipornynyń jumysshylary bolǵandyqtan, olarǵa bron da berilgen.
Aita keteiik, Resei tarapy urys qimyldaryna qatysýdan bas tartqandarǵa túrli qorqytý-úrkitý tásilderin qoldanatyny týraly BAQ-tarda birneshe ret aitylǵan. Shildede "Nastoiashee Vremia" telearnasy ondaǵan soldat Lýgansk oblysyndaǵy jertólede qamaýda otyrǵanyn habarlaǵan. Bul aqparatty keiin RF Prezidenti janyndaǵy adam quqyǵy keńesiniń músheleri rastaǵan.
