Qazaqstannyń terrorizmge qarsy ortalyǵy lańkestik toptarda júrgen qazaqstandyqtar týraly aqparat taratty, dep habarlaidy Sputnik Qazaqstan.
Shtab bastyǵynyń orynbasary Sergei Shveikinniń aitýynsha, búginde terroristik uiymdardyń qataryna qosylǵan Qazaqstan azamattarynyń sany - shamamen 40 adam. Olarmen birge áielderi, balalary jáne otbasynyń basqa músheleri barlyǵy 65 adam júr.
"Biz olardyń bárin bilemiz. Qylmystyq ister qozǵaldy. Keibir azamattar boiynsha áskeri qaqtyǵys kezinde olardyń qaza tapqany týraly aqparat tekserilip jatyr. Negizi, terroristik uiymdarǵa qosylǵan qazaqstandyqtardyń basym bóligi moraldyq jaǵynan kúizeliste júr. Olardyń arasynda elge qaitý joldaryn izdestirip júrgender de az emes. Olar zań aldynda jaýap berýge daiyn. Alaida qylmystyq áreketterin jalǵastyrýǵa múddeli jigitter de bar", - dedi Shveikin astanada ótken baspasóz máslihatynda.
Onyń sózine qaraǵanda, búginde lańkestik toptarǵa qosylýdy kózdeitin adamdardyń tranzitin toqtatýǵa arnalǵan sharalar qolǵa alynǵan. Máselen, biyl Qazaqstanda 31 adam ustalyp, ózge elderge qaitaryldy. Olardyń barlyǵy terroristik áreket úshin izdeýde júrgen.
"Qazaqstanda terroristik qaýip áli de bar. Islam memleketi* halyqaralyq terroristik uiymy Siriia men Irak aimaǵynda jeńilse de, Al-Kaida* men onymen bailanysy bar shaǵyn toptar terroristik bastamany qolǵa alýǵa daiyn", - dep atap kórsetti Shveikin.
* Qazaqstanda jáne basqa elderde tyiym salynǵan terroristik uiymdar
