QR Bilim jáne ǵylym ministrligi Til saiasaty komitetiniń uiymdastyrýymen onlain rejimde «Terminologiialyq baza: tájiribe jáne tehnologiia» atty respýblikalyq ádistemelik seminar ótti. Bul jaiynda atalǵan komitettiń baspasóz qyzmetinen málim etti, dep habarlaidy "Ult aqparat".
«Búginde órkeniettiń qarqyndy damýy aqparattyq tehnologiialar negizinde terminderdi júieleýdi barynsha jyldamdatýǵa jeteleidi. Atalǵan máseleni tiimdi sheshýde «termincom.kz» saity qajetti platforma bolyp otyr. Al barynsha ikemdilikke qol jetkizý úshin terminologiialyq baza kez kelgen tildik baǵyt úshin izdeýdi qamtamasyz etýi tiis jáne terminderdiń aqparattyq, lingvistikalyq, tehnikalyq sipattamasyn ashyp kórsete alýy kerek», - seminardy ashqan komitet tóraǵasy Ádilbek Qaba.
Seminar barysynda zaman talaptaryna sai ulttyq terminder bazasynyń qurylymy men qyzmeti, ony ázirleý joldary, halyqaralyq tájiribe talqylandy.
Is-sharada «Astana» halyqaralyq qarjy ortalyǵy Ákimshilik departamenti direktorynyń orynbasary, QR UǴA akademigi Sherýbai Qurmanbaiuly «Terminderdiń elektrondy málimet qoryn jasaý – terminqordy basqarý men ony tiimdi paidalanýdyń mańyzdy tetigi» taqyrybyna toqtalsa, budan keiin sóz alǵan Q.Jubanov atyndaǵy Aqtóbe óńirlik memlekettik ýniversitetiniń professory Sábira Isaqova terminologiialyq baza jasaýdyń halyqaralyq tájiribelerin saraptady. A.Baitursynuly atyndaǵy Til bilimi institýtynyń ǵylymi qyzmetkeri Nurlan Shúlenbaev «Qazaq tiliniń terminologiialyq bazasy: tájiribesi, baǵdary, áleýeti» baiandamasynda terminografiialyq eńbekterdiń baza jasaýdaǵy mańyzdylyǵyna nazar aýdardy.
Sondai-aq aýdarmashy, gýmanitarlyq ǵylymdar magistri Ainur Baekeeva «Digital Library basqarý júiesi negizinde terminologiialyq baza qurastyrý tájiribesi», al Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵy Aqparattyq tehnologiia basqarmasynyń basshysy Móldir Baqytqyzy «Elektrondyq terminologiialyq qordyń múmkindikteri» taqyrybynda baiandama jasady.
Seminar taqyryby boiynsha sóz alǵandar terminologiialyq baza jasaý terminderdi birizdendirýdiń mańyzdy qadamy ekendigin biraýyzdan atap ótti. Is-shara sońynda seminar qatysýshylaryna qarar jobasy tanystyrylyp, spikerlerge alǵyshat tapsyryldy.
