Búgin Almaty qalasy. Qazaqstan Respýblikasy Mádeniet jáne sport ministrligi Til saiasaty komitetiniń tapsyrmasymen Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵy «Terminderdi irikteýdiń kriteriileri men printsipteri» respýblikalyq ádistemelik seminar ótkizdi, – dep habarlaidy Ult aqparat.
Respýblikalyq ádistemelik seminardyń ózektiligi – Qazaqstan Respýblikasynda Tilderdi qoldaný men damytýdyń 2011-2019 jyldarǵa arnalǵan memlekettik baǵdarlamasyn iske asyrý maqsatynda qazaq tilin ǵylym tili retinde damytý úshin terminderdi birizdendirý jáne irikteý kriteriilerin belgileý, printsipterin aiqyndaý.
Seminar QR Mádeniet jáne sport vitse-ministri N.Dáýeshovtiń kirispe sózimen ashyldy.
Terminderdi irikteý men resmi bekitýge qoiylatyn negizgi talaptardy aiqyndaý seminardaǵy baiandamalardyń basty taqyryby boldy. QR UǴA korrespondent múshesi, filologiia ǵylymdarynyń doktory Sh.Qurmanbaiuly óz baiandamasynda terminderdi irikteýdiń kriteriilerin jáne printsipterin belgileý máselesin kóterip, naqty usynystaryn jetkizdi.
Kelesi baiandamashy A.Baitursynuly atyndaǵy Til bilimi institýtynyń ǵylymi qyzmetkeri, filologiia ǵylymdarynyń doktory Q.Kúderinova jańa álipbige kóshý barysyndaǵy terminderdiń jazylý úlgisi máselesine toqtaldy.
Qazaq tili álipbiin latyn grafikasyna kóshirý jónindegi Ulttyq komissiia janyndaǵy Terminologiialyq jumys tobynyń múshesi, filologiia ǵylymdarynyń doktory Q.Aidarbek terminologiianyń tildik normativtik sharttaryn talqyǵa saldy.
Elimizdegi tanymal ǵalymdar atsalysyp jatqan «Qazaq tilindegi 100 jańa oqýlyq» jobasyn iske asyrý barysynda kezdesken qiynshylyqtar men olardy sheshý joldary jaiynda sóz alǵan Ulttyq aýdarma biýrosynyń redaktory, filosofiia ǵylymdarynyń kandidaty Á.Quranbek óz tájiribesimen bólisti.
Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵy Qoldanbaly lingvistika basqarmasynyń basshysy, filologiia ǵylymdarynyń kandidaty S.Iteǵulova termintaný ǵylymynyń búgingi ahýaly men terminjasamnyń basty qaǵidalary boiynsha kópshilikke aqparat berýge arnalǵan elektrondyq alańdy tanystyrdy.
Sondai-aq atalǵan ádistemelik seminarda birqatar ǵalymdar men sala mamandary sóz alyp, óz pikirlerin bildirdi.
Issharaǵa Prezident Ákimshiliginiń jaýapty qyzmetkerleri, jetekshi ǵalymdar, Qazaqstan Respýblikasy Úkimetiniń janyndaǵy Respýblikalyq terminologiia komissiiasynyń músheleri, Qazaq tili álipbiin latyn grafikasyna kóshirý jónindegi Ulttyq komissiia janyndaǵy Terminologiialyq jumys tobynyń músheleri, ortalyq jáne jergilikti atqarýshy organdardyń jaýapty qyzmetkerleri, til salasy boiynsha óńirlik basqarma basshylary men qyzmetkerleri jáne BAQ ókilderi qatysty.
Respýblikalyq ádistemelik seminardyń qorytyndysy boiynsha terminderdi irikteý kriteriilerin belgileýge, printsipterin aiqyndaýǵa baǵyttalǵan qarar qabyldandy.
