Fotokollaj: © exk.kz
Shymkentte tergeý kezinde politsiia ǵimaratynda azappen ólgen qostanailyq Nurbolat Jumabaevtyń ólimi boiynsha qylmystyq iske núkte qoiyldy. Úkim 30 maýsym qalalyq qylmystyq ister jónindegi mamandandyrylǵan aýdanaralyq sotynda oqyldy, dep habarlaidy Otyrar.kz portaly.
Is materialdaryna sáikes aiyptalýshylarǵa Qylmystyq kodekstiń 362-baby (Bilikti nemese laýazymdyq ókilettikterdi asyra paidalaný) jáne 146-baby (Azaptaý) boiynsha aiyp taǵylǵan. Olardyń ekeýi Nurbolat Jumabaevtyń ólimi kezinde Shymkent qalalyq Politsiia departamenti kriminaldyq politsiia basqarmasy basshysynyń orynbasary qyzmetin, úshinshisi Qarataý aýdandyq politsiia basqarmasy kriminaldyq politsiia bóliminiń basshysy laýazymyn atqarǵan. Al sońǵysy jedel ýákil bolyp jumys istegen. Barlyǵy da tergeý kezinde kóz jumǵan jigittiń óliminen keiin jumystan bosatylǵan edi.
Sot úkimimen tórteýi de kináli dep tanyldy.
Jábirlenýshi taraptyń advokaty Talǵat Esimovtiń jazbasyndaǵy málimetke súiensek, Shymkent qalalyq PD kriminaldyq politsiia basqarmasy basshysynyń orynbasary qyzmetin atqarǵan D.Aimeshev 7 jyl 6 aiǵa bas bostandyǵynan aiyryldy. Basqarmanyń taǵy bir orynbasary laýazymyn atqarǵan Ý.Jánibekovke 7 jylǵa, Qarataý aýdandyq politsiia basqarmasy kriminaldyq politsiia bóliminiń basshysy bolǵan D.Isaevqa 3 jyl 6 aiǵa, sońǵy aiyptalýshy Á.Ótkirovke 2 jylǵa bas bostandyǵynan aiyrý jazasy taǵaiyndaldy. Budan ózge tórt aiyptalýshynyń 3 jylǵa deiin quqyq qorǵaý organdarynyń basshylyq qyzmetinde jumys isteý quqyǵy shekteldi. Sondai-aq olardyń ekeýi politsiia polkovnigi, ekeýi politsiia podpolkovnigi sheninen aiyryldy.
Aita keteiik, úkim zańdy kúshine engen joq.
Eske salaiyq, Nurbolat Jumabaev 2021 jyldyń 8 jeltoqsanynda Shymkent qalalyq Politsiia departamenti ǵimaratyna «Kólik urlyǵy» boiynsha kúdikti retinde jetkizilgen. Onyń qasynda dosy Sergei Petrov ta bolǵan. Ol keiinirek tilshilerge bergen suhbatynda "politseiler azaptap, kúsh qoldanǵanyn" aitty. 31 jastaǵy Nurbolattyń ákesi Erǵara Jumabaev ta ulyn "politseiler uryp óltirdi" degen bolatyn.
Marqumnyń týystarynyń aitýynsha, jas jigit Qostanaidan Shymkentke súiiktisin alyp ketý úshin kelgen.
