© Photo: Facebook / Qazaqstan temir joly
Májilis depýtaty Elnur Beisenbaev "Qazaqstan temir joly" ulttyq kompaniiasynyń jumysyn synǵa aldy, dep habarlaidy "Ult aqparat".
Onyń aitýynsha, búginde temirjol jolaýshylar tasymalynyń sapasy syn kótermeidi. Sebebi vagondar quramynyń kóp bóligi – keńes zamanynyń murasy. Jyl saiyn vagondar parkin jańartý máselesi kóterilgenimen, jospar oryndalmaidy.
"Qazirgi ýaqytta temirjol quramynyń keminde 60%-y tozǵan, paidalanýǵa jaramaidy. Al ministrlik vagondar parkin túbegeili jańartýdy 2030 jylǵa josparlap otyr. Osy oraida, eskere ketetin jait "Qazaqstan temir joly" ulttyq kompaniiasy 1997 jyly quryldy. Iaǵni, 26 jyl kútkenimiz azdai, endi taǵy da 7 jyl kútýimiz kerek. Kútken úmitimiz aqtalatynyna, vagondar parkin jańartý jumysy tiimdi bolatynyna senimimiz az. 2030 jyly qalǵan vagondar eskirip, temirjol quramy parkiniń tozýy 80 protsentten asyp ketpeitinine kim kepil?! ", - deidi Beisenbaev Premer-ministrge joldaǵan depýtattyq saýalynda.
Depýtattyń aitýynsha, jaz ailarynda poiyzǵa bilet tabý óte qiyn. Onyń ústine temirjol biletteriniń qunyn sýbsidiialaýǵa jyl saiyn qomaqty qarajat bólinse de, baǵa sharyqtap turady.
"Konditsioneri istemeitin, terezeleri ashylmaityn, qabyrǵasynda taraqandar júretin, qazirgi ýaqytta tozyǵy jetken vagondarǵa jaz mezgilinde bilet satyp alý arman boldy. Al sáti túsip bilet tapqan baqytty jandardy vagon ishinde naǵyz masqara kútip turady. Bilet tapshylyǵymen qatar, bilettiń qymbatshylyǵyn kórip otyrmyz. Olar ártúrli mobildi qosymshalarda satyp alý kezinde erekshelenedi", - dep ashyndy májilismen.
Beisenbaev QTJ-nyń qurylǵanyna 26 jyl bolsa da, bul saladaǵy jumys áli kúnge deiin rettelmegenin aitty.
"Sol sebepti depýtattyq saýalda kóterilgen máselelerdi jan-jaqty zerdelep, temirjol tasymaly máselesin túbegeili sheshýdi suraimyz. Bul - jai ǵana bir depýtattyń saýaly emes, bir óńirden ekinshi óńirge jaz boiy jete almaǵan myńdaǵan azamattyń amanaty. Jylyna 24 milliardtan astam tikelei sýbsidiia alatyn ulttyq kompaniianyń jumysyn retke keltiretin ýaqyt jetti", - dep málimdedi depýtat.
