Qazaqstanda emhanalardaǵy dáriger qabyldaýyna jazylý tártibi jańardy. Osyǵan bailanysty beiindi mamandarǵa ýchaskelik dárigerdiń joldamasynsyz birden barýǵa bolady degen aqparat taraǵan. Alaida Densaýlyq saqtaý ministrligi joldama júiesi tolyq joiylmaǵanyn túsindirdi, dep habarlaidy ult.kz Tengrinews aqparat portalyna silteme jasap.
Vedomstvo málimetinshe, jalpy praktika dárigeri (JPD) patsienttiń meditsinalyq baǵytyn anyqtaityn negizgi býyn bolyp qala beredi. Ol asqynbaǵan jaǵdailarda ózdiginen em kórsetip, qajet bolǵan jaǵdaida beiindi mamanǵa jiberedi.
Qandai jaǵdaida joldamasyz mamanǵa barýǵa bolady?
Jańa tártip boiynsha myna jaǵdailarda beiindi dárigerge ýchaskelik dárigerdiń joldamasynsyz jazylýǵa bolady:
- jaraqat alǵan kezde, onyń ishinde LOR jáne oftalmologiia baǵytyndaǵy shuǵyl jaǵdailarda;
- stomatologqa – shuǵyl jáne josparly jaǵdailarda;
- dermatovenerologqa – teri jáne venerologiialyq aýrýlar kezinde;
- akýsher-ginekolog pen psihologqa – tirkelgen emhanasy boiynsha (júktilik boiynsha alǵashqy esepke turý jaǵdaiynan basqa);
- onkologiialyq nemese gematologiialyq aýrýǵa kúdik bolǵanda, tiisti taldaý nemese ÝDZ nátijeleri bolsa;
- sozylmaly aýrýy bar, dinamikalyq baqylaýda turǵan patsientterge;
- qaitalama qabyldaýǵa – emdeý jaǵdaiy áli jabylmaǵan bolsa;
- jastar densaýlyq ortalyqtaryna, meditsinalyq poiyzdar men jyljymaly meditsinalyq keshenderge júgingen kezde.
Qalǵan jaǵdailarda beiindi mamanǵa alǵashqy ret barmas buryn terapevtke nemese JPD-ǵa qaralý qajet.
Dárigerge jazylýda taǵy qandai ózgerister bar?
Endi emhanalar beiindi mamandardyń qabyldaý kestesin 60 kúnge deiin aldyn ala ashýy tiis. Buǵan deiin jazylý kestesi negizinen 14 kúnge ǵana ashylatyn.
Sonymen qatar em aiaqtalmaǵan jaǵdaida patsientke qaitadan terapevtten joldama alýdyń qajeti joq. Beiindi maman patsienttiń mártebesin «emdelýi jalǵasýda» dep belgilep, qaita qabyldaýǵa ózi jazyp qoia alady.
Taǵy bir jańalyq – beiindi dáriger patsientti óz betinshe ÝDZ, KT, zerthanalyq taldaýlarǵa jibere alady. Sondai-aq eń kóbi úsh beiindi mamannyń konsýltatsiiasyna joldama bere alady.
Qabyldaýǵa jazylýdy emhananyń tirkeý bólimi, call-ortalyǵy, meditsinalyq uiymnyń mobildi qosymshasy nemese eGov.kz arqyly júzege asyrýǵa bolady.
