قازاقستاندا ەمحانالارداعى دەرٸگەر قابىلداۋىنا جازىلۋ تەرتٸبٸ جاڭاردى. وسىعان بايلانىستى بەيٸندٸ ماماندارعا ۋچاسكەلٸك دەرٸگەردٸڭ جولداماسىنسىز بٸردەن بارۋعا بولادى دەگەن اقپارات تاراعان. الايدا دەنساۋلىق ساقتاۋ مينيسترلٸگٸ جولداما جٷيەسٸ تولىق جويىلماعانىن تٷسٸندٸردٸ, دەپ حابارلايدى ult.kz Tengrinews اقپارات پورتالىنا سٸلتەمە جاساپ.
ۆەدومستۆو مەلٸمەتٸنشە, جالپى پراكتيكا دەرٸگەرٸ (جپد) پاتسيەنتتٸڭ مەديتسينالىق باعىتىن انىقتايتىن نەگٸزگٸ بۋىن بولىپ قالا بەرەدٸ. ول اسقىنباعان جاعدايلاردا ٶزدٸگٸنەن ەم كٶرسەتٸپ, قاجەت بولعان جاعدايدا بەيٸندٸ مامانعا جٸبەرەدٸ.
قانداي جاعدايدا جولداماسىز مامانعا بارۋعا بولادى?
جاڭا تەرتٸپ بويىنشا مىنا جاعدايلاردا بەيٸندٸ دەرٸگەرگە ۋچاسكەلٸك دەرٸگەردٸڭ جولداماسىنسىز جازىلۋعا بولادى:
- جاراقات العان كەزدە, ونىڭ ٸشٸندە لور جەنە وفتالمولوگييا باعىتىنداعى شۇعىل جاعدايلاردا;
- ستوماتولوگقا – شۇعىل جەنە جوسپارلى جاعدايلاردا;
- دەرماتوۆەنەرولوگقا – تەرٸ جەنە ۆەنەرولوگييالىق اۋرۋلار كەزٸندە;
- اكۋشەر-گينەكولوگ پەن پسيحولوگقا – تٸركەلگەن ەمحاناسى بويىنشا (جٷكتٸلٸك بويىنشا العاشقى ەسەپكە تۇرۋ جاعدايىنان باسقا);
- ونكولوگييالىق نەمەسە گەماتولوگييالىق اۋرۋعا كٷدٸك بولعاندا, تيٸستٸ تالداۋ نەمەسە ۋدز نەتيجەلەرٸ بولسا;
- سوزىلمالى اۋرۋى بار, ديناميكالىق باقىلاۋدا تۇرعان پاتسيەنتتەرگە;
- قايتالاما قابىلداۋعا – ەمدەۋ جاعدايى ەلٸ جابىلماعان بولسا;
- جاستار دەنساۋلىق ورتالىقتارىنا, مەديتسينالىق پويىزدار مەن جىلجىمالى مەديتسينالىق كەشەندەرگە جٷگٸنگەن كەزدە.
قالعان جاعدايلاردا بەيٸندٸ مامانعا العاشقى رەت بارماس بۇرىن تەراپەۆتكە نەمەسە جپد-عا قارالۋ قاجەت.
دەرٸگەرگە جازىلۋدا تاعى قانداي ٶزگەرٸستەر بار?
ەندٸ ەمحانالار بەيٸندٸ مامانداردىڭ قابىلداۋ كەستەسٸن 60 كٷنگە دەيٸن الدىن الا اشۋى تيٸس. بۇعان دەيٸن جازىلۋ كەستەسٸ نەگٸزٸنەن 14 كٷنگە عانا اشىلاتىن.
سونىمەن قاتار ەم اياقتالماعان جاعدايدا پاتسيەنتكە قايتادان تەراپەۆتتەن جولداما الۋدىڭ قاجەتٸ جوق. بەيٸندٸ مامان پاتسيەنتتٸڭ مەرتەبەسٸن «ەمدەلۋٸ جالعاسۋدا» دەپ بەلگٸلەپ, قايتا قابىلداۋعا ٶزٸ جازىپ قويا الادى.
تاعى بٸر جاڭالىق – بەيٸندٸ دەرٸگەر پاتسيەنتتٸ ٶز بەتٸنشە ۋدز, كت, زەرتحانالىق تالداۋلارعا جٸبەرە الادى. سونداي-اق ەڭ كٶبٸ ٷش بەيٸندٸ ماماننىڭ كونسۋلتاتسيياسىنا جولداما بەرە الادى.
قابىلداۋعا جازىلۋدى ەمحانانىڭ تٸركەۋ بٶلٸمٸ, call-ورتالىعى, مەديتسينالىق ۇيىمنىڭ موبيلدٸ قوسىمشاسى نەمەسە eGov.kz ارقىلى جٷزەگە اسىرۋعا بولادى.
