Qazaqstannyń birinshi raketkasy Aleksandr Býblik Kásipqoi tennisshiler qaýymdastyǵynyń (ATP) jańartylǵan reitingisinde joǵarylady, dep habarlaidy QazAqparat.
Qazaqstandyq tennisshi 37-den 36-orynǵa kóterildi.
Mihail Kýkýshkin 160-tan 162-ge, Dmitrii Popko 169-dan 173-ke syrǵysa, Timofei Skatov 193-satyda qaldy.
Reiting kóshin burynǵysha serbiialyq Novak Djokovich bastasa, reseilik Daniil Medvedev ekinshi, germaniialyq Aleksandr Zverev úshinshi orynda.
Juptyq synda Djo Selisberi (Ulybritaniia), Radjiv Ram (AQSh) jáne Mate Pavich (Horvatiia) úzdik úshtikte.
Qazaqstandyq Andrei Golýbev 24-ornyn saqtap qalsa, Aleksandr Nedovesov 62-den 63-ke, A.Býblik 67-den 68-ge tómendedi.
A.Býblik búgin Monte-Karlo ATP Masters 1000 týrnirinde alǵashqy ainalymda álemniń burynǵy úshinshi raketkasy, «Úlken dýlyǵa» jarystarynyń úsh dúrkin jeńimpazy, shveitsariialyq Stanislas Vavrinkamen oinaidy.
Áielder tennisi qaýymdastyǵy (WTA) reitingisinde Polsha ókili Iga Sviontek kóshbasshylyq rólin saqtasa, chehiialyq Barbora Kreichikova jáne ispaniialyq Paýla Badosa sáikesinshe ekinshi jáne úshinshi satyda.
Qazaqstannyń birinshi raketkasy Elena Rybakina 18-den 19-ǵa, al Iýliia Pýtintseva 46-dan 52-ge tómendedi. Iu.Pýtintseva 2018 jyldan beri alǵash ret úzdik elýlikten shyǵyp qaldy. Zarina Diias 113-orynda qaldy.
Juptyq synda chehiialyqtar Katerina Siniakova men Barbora Kreichikova jáne belgiialyq Elize Mertens alda keledi.
Qazaqstandyq Anna Danilina 21-den 20-ǵa kóterilip, óziniń úzdik kórsetkishin qaitalasa, E.Rybakina 54-satyda keledi.
Qazaqstan áielder quramasy 15-16 sáýirde Billi Djin King kýbogynyń irikteý saiysynda elordada Germaniia tennisshilerimen sheshýshi kezdesýin ótkizedi.
