Qazaqstannyń birinshi, álemniń 19-raketkasy Elena Rybakina Shtýtgart (Germaniia) WTA 500 týrniriniń ekinshi ainalymyna shyqty, dep habarlaidy QazAqparat.
Rybakina alǵashqy ainalymda dúniejúzilik reitingide 224-orynda turǵan, jarysqa arnaiy shaqyrtý alǵan germaniialyq Nastasia-Mariana Shýnkpen sheberlik baiqasty.
Qarsylastar buǵan deiin kezdespegen edi.
Ótken aptada elordada Qazaqstan – Germaniia matchynda Laýra Zigemýnd pen Anjelika Kerberdi utqan Rybakinaǵa bul joly da olardyń otandasy tap keldi.
Birinshi partiiada 19 jastaǵy nemis sportshysy 4:2 esebimen alǵa shyqqanymen, qazaqstandyq tennisshi tarazy basyn teńestirdi. Tai-breikte Rybakina basymdyq tanytty – 7:6 (7:3).
Ekinshi setti Elena breikpen bastady – 2:0. Alaida matchqa dop bergende, Shýnk breik jasap ketti – 5:5. Degenmen Rybakina sol boida qaitadan breikke qol jetkizdi – 6:5. Sodan keiin múmkindigin múlt jibergen joq – 7:5.
Eki saǵattan astam ýaqytqa sozylǵan tartysty básekede qazaqstandyq tennisshi 3 eispen birge 9 breik-pointtyń úsheýin paidalandy. Qarsylasy 3 eis, 2 breikpen (9 breik-point) kózge tústi.
Rybakina júlde qory 703 580 AQSh dollaryna baǵalanǵan dodanyń shirek finalyna shyǵý úshin álemniń 3-raketkasy, ispaniialyq Paýla Badosamen talasady.
Shtýtgart jarysynyń ótken jylǵy jeńimpazy, aýstraliialyq Eshli Barti biyl sporttyq mansabyn aiaqtaǵandyqtan, týrnirde jańa chempion anyqtalmaq.
Taǵy bir qazaqstandyq, álemniń 51-raketkasy Iýliia Pýtintseva Ystanbul WTA 250 týrnirinde baq synaidy. Ol bastapqy kezdesýin reitingte ózinen alty saty tómen turǵan Polsha ókili Magda Linetpen ótkizedi.
