قازاقستاننىڭ بٸرٸنشٸ, ەلەمنٸڭ 19-راكەتكاسى ەلەنا رىباكينا شتۋتگارت (گەرمانييا) WTA 500 تۋرنيرٸنٸڭ ەكٸنشٸ اينالىمىنا شىقتى, دەپ حابارلايدى قازاقپارات.
رىباكينا العاشقى اينالىمدا دٷنيەجٷزٸلٸك رەيتينگٸدە 224-ورىندا تۇرعان, جارىسقا ارنايى شاقىرتۋ العان گەرمانييالىق ناستاسيا-ماريانا شۋنكپەن شەبەرلٸك بايقاستى.
قارسىلاستار بۇعان دەيٸن كەزدەسپەگەن ەدٸ.
ٶتكەن اپتادا ەلوردادا قازاقستان – گەرمانييا ماتچىندا لاۋرا زيگەمۋند پەن انجەليكا كەربەردٸ ۇتقان رىباكيناعا بۇل جولى دا ولاردىڭ وتانداسى تاپ كەلدٸ.
بٸرٸنشٸ پارتييادا 19 جاستاعى نەمٸس سپورتشىسى 4:2 ەسەبٸمەن العا شىققانىمەن, قازاقستاندىق تەننيسشٸ تارازى باسىن تەڭەستٸردٸ. تاي-برەيكتە رىباكينا باسىمدىق تانىتتى – 7:6 (7:3).
ەكٸنشٸ سەتتٸ ەلەنا برەيكپەن باستادى – 2:0. الايدا ماتچقا دوپ بەرگەندە, شۋنك برەيك جاساپ كەتتٸ – 5:5. دەگەنمەن رىباكينا سول بويدا قايتادان برەيككە قول جەتكٸزدٸ – 6:5. سودان كەيٸن مٷمكٸندٸگٸن مٷلت جٸبەرگەن جوق – 7:5.
ەكٸ ساعاتتان استام ۋاقىتقا سوزىلعان تارتىستى بەسەكەدە قازاقستاندىق تەننيسشٸ 3 ەيسپەن بٸرگە 9 برەيك-پوينتتىڭ ٷشەۋٸن پايدالاندى. قارسىلاسى 3 ەيس, 2 برەيكپەن (9 برەيك-پوينت) كٶزگە تٷستٸ.
رىباكينا جٷلدە قورى 703 580 اقش دوللارىنا باعالانعان دودانىڭ شيرەك فينالىنا شىعۋ ٷشٸن ەلەمنٸڭ 3-راكەتكاسى, يسپانييالىق پاۋلا بادوسامەن تالاسادى.
شتۋتگارت جارىسىنىڭ ٶتكەن جىلعى جەڭٸمپازى, اۋسترالييالىق ەشلي بارتي بيىل سپورتتىق مانسابىن اياقتاعاندىقتان, تۋرنيردە جاڭا چەمپيون انىقتالماق.
تاعى بٸر قازاقستاندىق, ەلەمنٸڭ 51-راكەتكاسى يۋلييا پۋتينتسەۆا ىستانبۇل WTA 250 تۋرنيرٸندە باق سىنايدى. ول باستاپقى كەزدەسۋٸن رەيتينگتە ٶزٸنەن التى ساتى تٶمەن تۇرعان پولشا ٶكٸلٸ ماگدا لينەتپەن ٶتكٸزەدٸ.
