Qazaqstannyń birinshi, álemniń 19-raketkasy Elena Rybakina Dýbai WTA premer týrniriniń finalyna shyqty, dep habarlaidy "Ult aqparat".
E.Rybakina jartylai finalda álemniń 15-raketkasy, horvatiialyq Petra Martichpen kezdesti.
Birinshi partiia barysynda horvatiialyq sportshy 4:2 esebimen alǵa ketti. Degenmen Elena tarazy basyn teńestirip qana qoimai, tai-breikte jeńisti julyp aldy - 7:6 (7:5).
Ekinshi set te dál osylai órbip, Martich alǵa ketti - 3:0. Qazaqstandyq tennisshi taǵy da esepti teńestirip, tai-breikte match núktesin qoidy - 7:6 (7:2).
Tartysty báseke 2 saǵat 13 minýtqa sozyldy.
E.Rybakina júlde qory 3 mln AQSh dollaryna jýyqtaityn jarystyń finalynda álemniń 2-raketkasy, rýmyniialyq Simona Halep nemese reitingte 52-orynda turǵan amerikalyq Djennifer Bredidiń bireýimen bas júldeni sarapqa salady.
Qazaqstandyq tennisshi biyl osymen tórtinshi ret WTA dodasynyń finalyna shyǵyp otyr. Ol sonyń bireýinde jeńiske jetti. Endi Dýbaida utylǵannyń ózinde reitingte 17-orynǵa kóteriledi.
Eske sala keteiik, budan buryn E.Rybakinanyń Dýbai týrniriniń jartylai finalyna shyqqanyn jazǵan bolatynbyz.
