Qazaqstandyq Zarina Diias US Open týrniriniń ekinshi ainalymyna shyǵa almady, dep habarlaidy "Ult aqparat".
Dúniejúzilik reitingide 69-orynda turǵan Zarina Diias amerikalyq, álemniń 61-raketkasy Bernarda Peramen kortqa shyqty.
Qazaqstandyq tennisshi biyl 27-ge tolatyn bolsa, qarsylasy odan bir jas kishi, sheberlik deńgeileri de shamalas edi.
Birinshi partiiada Zarina 3:1 esebimen alǵa shyqqanymen, sol basymdylyǵyn ustap tura almady. Úsh geimdi qatar alǵan amerikalyq 4:3 esebimen alǵa ketkenimen, qazaqstandyq tennisshi qaita teńestirdi. Breik almasýmen bolǵan tennisshiler setti tai-breikke deiin jetkizdi, munda B.Peranyń baǵy jandy – 7:6 (7:4).
Ekinshi sette amerikalyq sportshy birden alǵa shyqty – 2:0. Aqyry ol bet qaratpady – 6:0.
Báseke 1 saǵat 45 minýtqa sozyldy.
B.Pera júlde qory 53,4 mln AQSh dollaryna baǵalanǵan «Úlken dýlyǵa» týrniriniń ekinshi ainalymynda álemniń 22-inshi, osy jarystyń 15-raketkasy, grekiialyq Mariia Sakkarimen nemese reitingte 114-satydaǵy shveitsariialyq Stefani Fiogelmen kezdesedi.
