Qazaqstandyq Timofei Skatov Almaty chellendjer týrniriniń finalyna shyqty, dep habarlaidy "Ult aqparat".
Dúniejúzilik reitingte 399-orynda turǵan 20 jastaǵy qazaqstandyq tennisshi jartylai finalda óziniń qurdasy, álemniń 279-raketkasy, taibeilik Tszen Tszenmen sheberlik baiqasty.
Jasóspirim kezderinde ekeýi de tabysty óner kórsetip, ózara bir ret kezdesip, onda taibeilik tennisshi jeńiske jetken eken.
Birinshi partiiada Skatov bastap dop berdi. Tartysty geimde qarsylasy bes birdei breik-pointty paidalana almady. Esesine sosyn qazaqstandyq tennisshi qos breik jasap, esepti 5:1-ge jetkizdi. Budan keiin taibeilik sportshy breik jasady. Degenmen Timofei bul setti taǵy bir breikpen támamdady – 6:2.
Ekinshi sette esep 2:1 bolǵan mezette qazaqstandyq sportshy breik jasaǵanymen, qarsylasy sol boida ese qaiyrdy. Esep 4:3 bolǵanda, Skatov taǵy bir breikke qol jetkizdi. Sosyn matchqa dop bergende, óz múmkindigin jibergen joq – 6:3.
Báseke 1 saǵat 31 minýtqa sozyldy.
Skatov finalda taǵy bir qazaqstandyq Dmitrii Popko nemese belgiialyq Zizý Bergstiń bireýimen bas júldeni sarapqa salady.
