Qazaqstannyń birinshi, álemniń 20-raketkasy Elena Rybakina US Open týrnirin jeńispen bastady, dep habarlaidy "Ult aqparat".
Osy «Úlken dýlyǵa» jarysynyń 19-raketkasy bolyp tirkelgen qazaqstandyq tennisshi bastapqy kezdesýin reitingte 90-satydaǵy Belarýs ókili Aleksandra Sasnovichpen ótkizdi.
Birinshi partiiada qos breik jasaǵan Rybakina qarsylasyna des bergen joq – 6:2.
Ekinshi sette esep 4:3 bolǵan mezette qazaqstandyq tennisshi breik jasai bildi. Sosyn matchqa dop bergende, múmkindigin jibergen joq – 6:3.
Rybakina 1 saǵat 15 minýtqa sozylǵan báseke barysynda 10 eis jasap, 10 breik-pointtyń úsheýin paidalandy. Breik jasai almaǵan qarsylasy 1 eispen shekteldi.
Osylaisha otandasymyz ekinshi ainalymda álemniń 62-raketkasy, frantsiialyq Karolin Garsiia nemese reitingte 151-orynda turǵan ulybritaniialyq Herriet Darttyń bireýimen sheberlik baiqaspaq.
