Qazaqstandyq Iýliia Pýtintseva Niý-Iorkta ótip jatqan Tsintsinnati WTA týrniriniń úshinshi ainalymyna shyǵa almady, dep habarlaidy "Ult aqparat".
Dúniejúzilik reitingte 33-orynda turǵan Iu.Pýtintseva ekinshi kezdesýin álemniń 21-inshi, osy dodanyń 13-raketkasy, grekiialyq Mariia Sakkarimen ótkizdi.
Qarsylastardyń ekeýi de bir jyldyń tóli, 25 jasta.
Birinshi partiiada esep 5:4 bolǵan mezette grekiialyq sportshy breik jasap, setti óz paidasyna sheshti – 6:4.
Ekinshi sette de M.Sakkari breikpen alǵa shyqty – 3:1. Degenmen qazaqstandyq tennisshi qaiyra breik jasap, óz geimin de jibermei, tarazy basyn teńestire aldy – 3:3. Aqyry másele tai-breikte sheshildi. Onda bastapqyda Iýliia 3:0-men alǵa shyqqanymen, Mariia esepti teńestirdi. Sosyn esep 6:5 bolǵanda, matchbolyn paidalana almady. Qazaqstandyq tennisshi de setbolyn múlt jiberdi. Budan keiin grekiialyq sportshy matchty sátti támamdai aldy – 7:6 (11:9).
Tartysty báseke 1 saǵat 44 minýtqa sozyldy.
M.Sakkari júlde qory 2,2 mln AQSh dollarynan asatyn jarystyń shirek finalyna shyǵý úshin álemniń burynǵy birinshi, qazirgi 9-raketkasy, amerikalyq Serena Ýiliams nemese Niderlandy ókili Arancha Rýstyń bireýimen talasady.
