Qazaqstandyq Iýliia Pýtintseva Sankt-Peterbýrg WTA týrnirinde utylyp qaldy, dep habarlaidy "Ult aqparat".
Álemniń 34-raketkasy Iu.Pýtintseva alǵashqy ainalymda reitingte ózinen tórt saty tómen turǵan reseilik Veronika Kýdermetovamen kezdesti.
Birinshi partiia tai-breikke deiin sozylyp, onda Kýdermetovanyń joly boldy – 7:6 (7:4).
Esesine ekinshi sette Pýtintseva bet qaratpady – 6:1. Alaida ol osy qarqynyn sheshýshi partiiada saqtai almady. Esep 5:6 bolǵan mezette dop bergen qazaqstandyq tennisshi qatelikke boi aldyryp, qarsylasy breik jasap ketti – 5:7.
Tartysty báseke 2 saǵat 36 minýtqa sozyldy.
Match barysynda Kýdermetova 7 eis jasap, 8 breik-pointtyń beseýin paidalana bildi. Bir ǵana ret eis jasaǵan Pýtintseva 16 breik-pointtyń altaýyn ǵana óz esebine jaza aldy.
Kelesi ainalymda V.Kýdermetova álemniń 8-inshi, osy jarystyń ekinshi raketkasy, Niderlandy ókili Kiki Bertenspen kúsh synasady. Ótken jylǵy týrnirde dál osy K.Bertens jeńimpaz atanǵan bolatyn.
Eske sala keteiik, budan buryn Elena Rybakinanyń Sankt-Peterbýrg týrnirin jeńispen bastap, Aleksandr Býbliktiń Rotterdam jarysynyń ekinshi ainalymyna shyqqanyn jazǵan bolatynbyz.
E.Rybakinanyń ekinshi ainalymdaǵy qarsylasy búgin anyqtalady. Qazaqstandyq sportshy qos frantsiialyq Karolin Garsiia men Fiona Ferronyń qai jeńgenimen kezdesedi. F.Ferro jarysqa qatysýdan bas tartqan latviialyq Anastasiia Sevastovany aýystyrdy.
