Qazaqstandyq tennisshi Iýliia Pýtintseva Rimde Italiia ashyq chempionatynyń jartylai finalyna shyǵa almady, dep habarlaidy "Ult aqparat".
Reitingte 30-orynda turǵan Iu.Pýtintseva shirek finalda álemniń ekinshi, osy dodanyń 1-raketkasy, rýmyniialyq Simona Haleppen kezdesti.
Iýliia biyl 25-ke tolsa, kezinde dúniejúzilik reitingte kósh bastaǵan rýmyniialyq tennisshi odan úsh jasqa úlken edi.
Buǵan deiin qarsylastardyń joly bir-aq ret toqailasqan-dy. Biyl qańtarda Aýstraliia ashyq chempionatynyń úshinshi ainalymynda S.Halep 6:1, 6:4 esebimen utqan bolatyn.
Qazaqstandyq tennisshi matchty jaman bastaǵan joq. Birinshi partiiada esep 1:1 bolǵan kezde qos birdei breik-pointty paidalana almady. Budan keiin rýmyniialyq sportshy kúsh alyp, 4:1 esebimen alǵa ketti. Aqyry setti taǵy bir breikpen túiindedi – 6:2.
Ekinshi sette esep 0:2 bolǵannan keiin ózin jaisyz sezingen Iu.Pýtintseva básekeni jalǵastyrýdan bas tartty. Ol osynyń aldynda da meditsinalyq kómekke júgingen edi.
Sóitip Iýliia Simonadan qarymta qaitara almady.
S.Halep finalǵa shyǵý úshin álemniń 14-raketkasy, biylǵy US Open týrniriniń finalisi, Belarýs ókili Viktoriia Azarenko nemese reitingte 17-satydaǵy ispaniialyq Garbine Mýgýrýsanyń bireýimen talasady.
Jalpy, Iu.Pýtintseva koronavirýs indetine bailanysty oryn alǵan úzilisten keiin tabysty óner kórsetýde. US Open týrniriniń shirek finalyna deiin jetip, 425 myń AQSh dollary kóleminde tabys tapty. Reitingte 35-ten 30-satyǵa kóterilgen Iýliia Italiia ashyq chempionatynyń da shirek finalyna deiin jetip otyr. Ótken jyly ol ekinshi ainalymnan asa almaǵan edi.
