Devis kýbogy irikteý saiysynda 4-5 naýryz kúnderi Norvegiiamen ótetin matchqa qatysatyn Qazaqstan quramasy jariialandy, dep habarlaidy QazAqparat.
Qazaqstan tennis federatsiiasy málim etkenindei, Iýrii Shýkin bastaǵan bapkerlik quram myna oiynshylarǵa toqtady.
Jekelei synda Qazaqstannyń birinshi, álemniń 35-raketkasy Aleksandr Býblik, reitingte sáikesinshe 166-ynshy jáne 180-orynda turǵan Mihail Kýkýshkin men Dmitrii Popko el namysyn qorǵaidy.
Juptyq synda álemniń 35-raketkasy Andrei Golýbev pen Aleksandr Nedovesov (67-oryn) kortqa shyǵady.
Oiyndar Oslodaǵy Oslo Tennis Arena hard korttarynda bolady. Match jeńimpazy Devis kýbogynyń finaldyq kezeńine joldama alady.
«Norvegiia quramasy negizinen álemniń 8-raketkasy Kasper Rýýd pen dúniejúzilik reitingte 332-orynda turǵan Viktor Dýrasovichqa senim artady. 24 jastaǵy Dýrasovich komanda quramynda kópten oinap keledi, jekelei jáne juptyq synda jaqsy óner kórsete alady. Degenmen bizdiń jigitter turaqty oiyn órnegin tanytyp, kózdegen maqsatyna jete alady dep oilaimyn», dedi Qazaqstan quramasynyń kapitany Iu.Shýkin.
