Qazaqstannyń birinshi, álemniń 44-raketkasy Aleksandr Býblik Maiami ATP 1000 týrniriniń shirek finalyna shyqty, dep habarlaidy "Ult aqparat".
A.Býblik tórtinshi ainalymda álemniń 32-inshi, osy jarystyń 22-raketkasy Teilor Fritspen kezdesti.
Qos tennisshi 23 jasta. Buǵan deiin eki márte ózara kezdesip, ekeýinde de qazaqstandyq tennisshi jeńiske jetken.
Birinshi partiia qarsylastardyń breik almasýymen bastaldy. Sodan keiin A.Býblik 3:1 esebimen alǵa shyqqanymen, T.Frits tarazy basyn teńestirdi. Tai-breikte amerikalyq tennisshi azyraq qatelesti – 7:6 (7:5).
Ekinshi sette A.Býblik breikpen alǵa ketti – 4:2. Sosyn tórtinshi setbolyn paidalana aldy – 6:3.
Úshinshi, sheshýshi partiiada esep 2:2 bolǵan mezette qazaqstandyq sportshy breik jasai bildi. Taǵy bir breik – 5:2. Budan keiin amerikalyq tennisshi esepti qysqartqanymen, A.Býblik ekinshi ret matchqa dop bergende, óz múmkindigin múlt jibergen joq – 6:4.
Tartysty báseke 2 saǵat 12 minýtqa sozyldy.
Match barysynda Býblik 23 ret eis jasady.
Osylaisha qazaqstandyq tennisshi óz sporttyq jolynda alǵash ret «Úlken dýlyǵa» týrnirlerinen keiingi eń bedeldi jarys sanalatyn masters dodasynyń shirek finalyna shyqty.
Býblik júlde qory 3,34 mln AQSh dollaryna baǵalanǵan Maiami dodasynyń jartylai finalyna shyǵý úshin álemniń 31-raketkasy, italiialyq Iannik Sinnermen talasady. Ia.Sinner tórtinshi ainalymda reitingte 83-orynda turǵan fin sportshysy Emil Rýýsývýoridi 6:3, 6:2 esebimen utty.
Budan buryn Dýbai jarysynda A.Býblik tartysty matchta italiialyq tennisshiden jeńilip qalǵan bolatyn.
