Teńiz ken ornynyń vahtashylar turatyn aýylynda koronavirýs juqtyrǵan áielmen bailanysty bolǵandar anyqtaldy. Olardyń jalpy sany 10 adam, dep habarlaidy "Ult aqparat".
Óńirlik kommýnikatsiialar qyzmetinde ótken brifingide Atyraý oblystyq densaýlyq saqtaý basqarmasy bastyǵynyń orynbasary Gúlnafis Tańbaeva Vaternas atty vahtashylar aýylyndaǵy 50 jastaǵy áielmen bailanysta bolǵan 10 adamnyń barlyǵynan analiz alynǵandyǵyn habarlady.
Jumysshylardyń barlyǵy oqshaýlandyrylyp, statsionarǵa jatqyzylǵan. Sonymen qatar virýs juqtyrǵan adammen bailanysta bolǵandarmen qarym-qatynas jasaǵan taǵy 50 adam oqshaýlandyryldy.
«Teńizshevroil» JShS Qoǵammen jáne BAQ-pen bailanys jónindegi bas menedjer Rzabek Artyǵalievtiń sózinshe, qazirgi tańda Teńiz kenishinen shyǵýǵa tyiym salynǵan. Kenishke tek birinishi kezekte qajetti taýarlardy tasymaldaityn kólikter men júk kólikterine ǵana kirýge ruqsat etilgen. Júrgizýshilerdiń dene qyzýy tekserilip jatyr. Kenishke kiretin jerlerde 4 sanitarlyq beket ornatyldy. Kásiporynnyń ózinde adamdar ara qashyqtyqty saqtap júredi, barlyq óndiris nysandary dezinfektsiialanyp, termometriialyq skrining júrgizilip jatyr.
