Teńiz kenishindegi jarylystan qaitys bolǵan eki jumysshynyń nesiesi jabylady. Bul týraly «Senimdi qurylys» kompaniiasynyń óndiristik qatynastar jónindegi menedjeri Gúlmira Batpanova málim etti, dep habarlaidy QazAqparat.
«Eki áriptesimiz qaitys bolǵan qaiǵyly jaǵdai bizge aýyr tidi. Marqumdardyń otbasyna qaiǵyryp kóńil aitamyz. Bizdiń kompaniiada mundai oqys oqiǵa birinshi ret tirkelip otyr. Qaitys bolǵan eki áriptesimizdiń otbasyna barlyq kómekti kórsetemiz. Qazir «Teńizshevroil» JShS men oblystyq memlekettik eńbek inspektsiiasy basqarmasynyń qyzmetkerleri kirgen birlesken komissiia quryldy. Dál qazir jarylysqa ne sebep bolǵanyn aita almaimyz. Tekserý komissiiasyna qajetti qujattardyń bárin berdik», - dep habarlady Gúlmira Batpanova.
Onyń aitýynsha, jarylystan qaitys bolǵan eki jumysshynyń da jasy 37-de bolǵan. «Senimdi qurylys» JShS olardyń otbasyna materialdyq kómek kórsetedi.
«Kompaniia marqumdardy sońǵy saparǵa shyǵaryp salýǵa jumsalatyn barlyq materialdyq shyǵyndy óz moinyna aldy. Sonymen qatar, olardyń barlyq qaryzdary men nesielerin jabý, balalarynyń oqý aqysyn tóleý týraly sheshim qabyldandy. Búgin qajetti iri qara mal satyp alýǵa 500 myń teńgeden qarjy aparyp berdik. Aldaǵy ýaqytta bul otbasylarǵa kómektesýdi mindetimizge alamyz», - dedi Gúlmira Batpanova.
Qazir «Senimdi qurylys» JShS-niń óndiristik nysanyndaǵy jumys ishinara toqtatylǵan. Jumysshylar úiine jiberilgen. Qaiǵyly oqiǵa vahtalyq aýysymnyń aiaqtalýyna eki kún qalǵanda bolǵan.
