Atyraý oblysynda eńbek shartynyń 82,4 paiyzy esepke alýdyń biryńǵai júiesine engizilgen, dep habarlaidy QazAqparat.
Bul týraly oblys ákimi janyndaǵy áleýmettik áriptestik pen eńbek qatynastaryn retteý jónindegi úsh jaqty komissiia otyrysynda belgili boldy.
Oblystyq memlekettik eńbek inspektsiiasy basqarmasynyń basshysy Igilik Áýbákirovtiń aitýynsha, qazir eńbek shartyn esepke alýdyń biryńǵai júiesine engizý deńgeii 82,4% qurap otyr.
«Atyraý qalasynda 455 mekemede 28 998, Jylyoi aýdanynda 3 869, Inderde – 213, Isataida – 276, Maqatta – 117, Mahambette – 358, Qyzylqoǵada – 75, Qurmanǵazy aýdanynda 478 eńbek sharty biryńǵai júiege tirkelmegen. Jyl sońyna deiin bul kórsetkishti 85%-ǵa jetkizý úshin basqarma basshylary men qala, aýdanda ákimderi Úkimettiń tapsyrmasyn jeke baqylaýǵa alýy qajet», - dedi Igilik Áýbákirov.
Al, «Teńizshevroil» JShS kúrdeli jobalar jónindegi bas menedjerdiń orynbasary Erbol Jumaǵazievtiń deregine qaraǵanda Teńiz jobasyndaǵy qyzmetkerlerdi josparly bosatý jumys kóleminiń aiaqtalýyna qarai júzege asyrylady.
Máselen, qarasha-jeltoqsan ailaryna jasalǵan boljamǵa sáikes 6 159 adam jumystan bosatylady.
Al, 753 adam basqa jumysqa aýystyrylady.
«Biylǵy tamyzda Atyraý oblysy ákimdiginiń jobadan bosatylatyn qyzmetkerlerge qoldaý kórsetý jónindegi usynysyna orai qysqa merzimdi oqytý kýrstary iske qosyldy. Qazir jobadan bosatylǵan 81 adam atalǵan kýrstan ótti. Onyń ishinde 64 adam jumysqa ornalasty», - deidi Erbol Jumaǵaziev.
Oblys ákimi Serik Shápkenovtiń pikirinshe, eńbek kelisimshartyn júieleý, qyzmetkerlerge áleýmettik aýdarymdy ýaqytyly júrgizý qajet.
«Kez kelgen mekemede jalaqyǵa nemese áleýmettik tólemderge qatysty eshqandai másele týyndamaýy qajet. Eger basshylar bul jumysty júrgize almasa, ornyn bosatýyna týra keledi. Basshynyń salǵyrttyǵynan qyzmetkerler qiyndyq kórmeýi tiis. Qyzmetkerler jumysyn adal atqarady, alaida, jalaqysy da, áleýmettik jarnasy da ýaqytynda aýdarylmaidy. Bulai bolmaidy. Sondyqtan, bul máseleni baqylaýda ustaý qajet», - dedi Serik Shápkenov.
