Elimizdegi eń iri 3 munei ken ornynan 3,3 mlrd teńge mindetti tólemder men salyq túsken.
Bul týraly Energetika ministri Nurlan Noǵaev ortalyq kommýnikatsiialar qyzmetinde ótken el aldyndaǵy eseptik kezdesýi kezinde aitty, dep habarlaidy "Ult aqparat".
«Elimizdiń úsh iri munai ken orny – Teńiz, Qarashyǵanaq jáne Qashaǵan ken oryndarynda 53,8 mln tonna munai jáne 44 mlrd tekshe metr gaz óndirildi. Salynǵan investitsiianyń kólemi – 5,2 mlrd dollar. Mindetti tólemder men salyqtan 3,3 mlrd dollar tústi. Qazirgi tańda bul ken oryndarynda iri jobalar júzege asyrylyp jatyr», - dedi ministr.
Sondai-aq, ol biyl óndiriletin munai men kondensat kólemi byltyrǵydan az bolatynyn eskertti.
«Biylǵy jospar boiynsha álemdegi shekteýlerdi eskere otyryp, 85,3 mln tonna munai men kondensat óndiremiz dep otyrmyz. Onyń ishinde eksportqa 67,5 mln tonna munai ónimin shyǵaryp, 17 mln tonnasyn ózimizde óńdep, 12,4 mln tonna munai ónimin ishki naryqqa joldaimyz», - dedi vedomstvo basshysy.
Onyń aitýynsha, 2020 jyldyń munai jáne kondentsat óndirý jospary 90 mln tonna bolǵanymen, jyl qorytyndysy boiynsha 85,7 mln tonna munai men kondensat óndirilgen. Sonyń 68,6 mln tonnasy eksportqa jóneltilse, 15 mln 800 myń tonna el aýmaǵynda óńdelip, 11,5 mln tonna ónim alynǵan.
