Qazaqstannyń depozitterge kepildik berý qory agent bank retinde «Eýraziialyq bank» AQ tańdady. Qordyń qarajaty esebinen kepildik berilgen ótemdi «Tengri Bank» AQ salymshylaryna osy bank tóleitin bolady, dep habarlady "Ult aqparat".
«Tengri Bank» AQ depozitterinde, aǵymdaǵy shottarynda jáne kartochkalarynda qarajaty bar jeke tulǵalar men kásipkerler ótem alýǵa ótinish bere alady.
Kepildik berilgen ótem tóleýge ótinishter qabyldaý 2020 jyldyń 30 qyrkúieginen bastalady. «Eýraziialyq bank» AQ bólimsheleri eldegi epidemiologiialyq jaǵdaidy eskere otyryp, kezek kútýdi azaitý maqsatynda «Tengri Bank» AQ salymshylaryna taiaýdaǵy demalys kúnderi – 3 -4 qazanda qosymsha qyzmet kórsetetin bolady. QDKBQ salymshylarǵa agent banktiń bólimshelerine barmai turyp, onyń saity arqyly bólimshelerdiń jumys kestesin qaraýy kerek.
Agent bank sondai-aq ótinishterdi qashyqtan berý jáne ótem somalaryn onlain tekserý boiynsha optsiialardy qarastyratyn bolady. Bul týraly tolyq aqparatty «Eýraziialyq bank» AQ saitynan alýǵa múmkindik bar.
Agent bank arqyly kepildik berilgen ótem tóleý sharasy 12 ai boiy – 2021 jyldyń 30 qyrkúiegine deiin júzege asyrylady. Qor belgilengen merzimniń aiaqtalýyna qarai agent bankpen aradaǵy kelisimniń qoldanylý merzimin uzartýy múmkin. Agent bank arqyly belgilengen ótem tóleý merzimi aiaqtalǵan soń, «Tengri Bank» AQ salymshylary tólem alý jóninde tikelei QDKBQ-ǵa ótinish bere alady.
Aita ketsek, QDKBQ kepildik berilgen ótemdi depozittegi qaldyq soma sheginde, bank litsenziiasynan aiyrylǵan kúnge qarai eseptelgen syiaqyny eskere otyryp tóleidi:
– ulttyq valiýtadaǵy jinaq depozitter boiynsha – 15 mln teńgeden;
– ulttyq valiýtadaǵy basqa depozitter boiynsha – 10 mln teńgeden;
– jáne shetel valiýtasyndaǵy depozitter boiynsha – valiýta balamasynda 5 mln teńgeden aspaidy («Tengri Bank»AQ litsenziiasynan aiyrylǵan kúni belgilengen valiýta aiyrbastaý baǵamy boiynsha).
«Tengri Bank» AQ salymshysynyń bankte túri men valiýtasy boiynsha eki jáne odan da kóp kepildendirilgen depozitteri bar bolsa, agent bank olar boiynsha 15 mln teńgeden aspaityn kólemde kepildik berilgen jiyntyq ótem tóleidi. Bul rette shetel valiýtasyndaǵy depozittiń 5 mln teńgeden aspaityn kepildendirilgen qaldyǵy boiynsha shekteý eskeriledi.
Kepildik berilgen ótemdi alý úshin «Tengri Bank» AQ salymshylary Eýraziialyq banktiń kez kelgen filialy nemese bólimshesine baryp, tólem alýǵa ótinish toltyrýlary qajet. Ótinish blankisin tikelei agent bankten alýǵa nemese QDKBQ saitynan elektrondy nusqasyn júktep alyp, aldyn ala toltyrýǵa bolady.
Agent banktiń barlyq qalalardaǵy filialdary men bólimsheleriniń mekenjailary jáne jumys tártibi týraly aqparat www.eubank.kz resmi saitynda jáne banktiń anyqtama qyzmetinde qoljetimdi: +7 (727) 332 77 22, +7 (771) 000 7722, +7 (700) 000 7722, +7 (702) 010 7722.
Salymshy agent bankke jeke basyn kýálandyratyn qujatpen barýy qajet. Eger salymshynyń ornyna basqa tulǵa ótinish beretin bolsa, quqyq belgileýshi qujattardy da usyný qajet (mysaly, muragerlik quqyǵy týraly kýálik nemese senimhat).
Salymshynyń tegi, aty nemese ákesiniń aty ózgergendigi agent bankte neke qiiý týraly kýálikpen nemese Azamattyq hal aktilerin jazý (AHAJ) organy beretin tegin, atyn jáne ákesiniń atyn ózgertý týraly kýálikpen rastalady.
Jekelegen jaǵdailarda agent bank málimdelgen talaptardyń negizdiligin rastaityn qosymsha qujattar suratýǵa quqyly. Kepildik berilgen ótem salymshy qujattary agent bankke kelip túsken kúnnen bastap 5 jumys kúni ishinde tólenedi.
Eske salaiyq, 2020 jyldyń 18 qyrkúieginde Qazaqstan Respýblikasynyń Qarjy naryǵyn retteý jáne damytý agenttigi «Tengri Bank» AQ-syn barlyq bank operatsiialaryn júrgizý litsenziiasynan aiyrý týraly sheshim qabyldaǵan bolatyn.
