QR Qarjy naryǵyn retteý jáne damytý agenttigi Tengri Bank-ti banktik jáne ózge de operatsiialardy júrgizý jónindegi litsenziiasynan aiyrdy. Al bank salymshylary ondaǵy aqshalaryn qalai alady?
Qazaqstannyń depozitterge kepildik berý qorynyń habarlaýynsha, «Tengri Bank» AQ jeke tulǵalardyń depozitterine mindetti kepildik berý júiesiniń qatysýshysy bolyp tabylady, iaǵni jeke tulǵalar men jeke kásipkerlerdiń salymdarynda, aǵymdaǵy shottary men tólem kartochkalarynda ornalastyrylǵan aqshalaryna «Qazaqstannyń depozitterge kepildik berý qory» AQ (QDKBQ) kepildigi qoldanylady, dep habarlaidy "Ult aqparat" qordyń baspasóz qyzmetine silteme jasap.
«Bul degenimiz, Agenttik banktiń aktivteri men mindettemelerin basqa bankke bir mezette ótkizý operatsiiasyn júrgizýden bas tartqan jaǵdaida, QDKBQ salymshylarǵa kepildik berilgen ótemdi tóleý sharasyn júzege asyrady. QDKBQ ótem tóleýdi bastaý kúnin zańnamada bekitilgen merzimde habarlaidy. Iaǵni, tólemderdi júzege asyrý sharasy resmi habarlama Qor saitynda jáne buqaralyq aqparat quraldarynda jariialanǵan kúnnen bastap, 5 jumys kúni ishinde bastalady», - delingen habarlamada.
Eske salamyz, QDKBQ kepildik berilgen ótemdi depozittegi qaldyq soma sheginde, bank litsenziiasynan aiyrylǵan kúnge qarai eseptelgen syiaqyny eskere otyryp tóleidi:
teńgedegi jinaq depozitter boiynsha – 15 mln teńgeden; teńgedegi basqa depozitter boiynsha – 10 mln teńgeden; shetel valiýtasyndaǵy depozitter boiynsha – valiýta balamasynda 5 mln teńgeden aspaidy (bank litsenziiasynan aiyrylǵan kúni belgilengen valiýta aiyrbastaý baǵamy boiynsha).
Jeke tulǵa nemese jeke kásipkerdiń bankte túri men valiýtasy boiynsha eki jáne odan da kóp kepildendirilgen depozitteri bar bolsa, QDKBQ olar boiynsha 15 mln teńgeden aspaityn kólemde kepildik berilgen jiyntyq ótem tóleidi. Bul rette shetel valiýtasyndaǵy depozittiń 5 mln teńgeden aspaityn kepildendirilgen qaldyǵy boiynsha shekteý eskeriledi. Saqtalýyna kepildik berilgen shekti somadan asatyn qaldyǵy bar depozitter boiynsha QDKBQ joǵaryda atap kórsetilgenindei tek bekitilgen somany ǵana ótedi. Al ótelmei qalǵan artyq aqsha boiynsha salymshylar bankti eriksiz taratý týraly sot sheshimi zańdy kúshine engen soń baryp, bankti taratý komissiiasyna ótinish bere alady.
Tólemdi alý úshin salymshyda jeke basyn kýálandyratyn qujaty bolsa jetkilikti. Tolyqqandy nusqaýlyq QDKBQ saitynda ornalastyrylǵan. Depozitter boiynsha kepildikter jáne kepildik berilgen ótemdi tóleý týraly jalpy aqparattar QDKBQ www.kdif.kz saitynda qol jetimdi.
