QR Ulttyq banki tóraǵasynyń orynbasary Áliia Moldabekova qarjy naryǵyndaǵy ahýaldy baiandap, teńgeniń kúsheiýine qatysty faktorlardy atady, dep habarlaidy QazAqparat.
Onyń aitýynsha, sáýirde álemdik naryqtaǵy ahýal sońǵy 3 aidaǵy eń táýir kórsetkishke jetken. Qor indeksteri ósip, damýshy memleketterdiń valiýtalary turaqtalyp, shikizat naryǵyndaǵy baǵalar túzele bastady.
«Mamyrda ekonomikalyq belsendiliktiń artyp, karantin sharalarynyń jeńildetilýine bailanysty osyndai dinamika qalyptasty. Damyǵan elderdiń ortalyq bankteri qarjy aktivterin satyp alýdy jalǵastyra bastady. AQSh Federaldy rezervi ortalyq bankterge svop jeliler arqyly dollar likvidtiligin usyna bastady», - dedi Áliia Moldabekova.
Onyń aitýynsha, naýryzdaǵy aýqymdy shoktan keiin teńgeniń kúsheiýine munai baǵasynyń turaqtalýy yqpal etken.
«Munai naryǵyndaǵy turaqtylyqtyń oralýy energiia tasymaldaýshy taýar baǵasyn qalpyna keltirdi. Saýd Arabiiasy munai óndirýdi taǵy da táýligine 1 mln barrelge qysqartý týraly sheshim shyǵardy. AQSh-ta burǵylaý qondyrǵylarynyń sany 222-ge jetti. Bul 10 jyldaǵy rekord azaiý kórsetkishi. Qara altyn kotirovkasy mamyrda 40%-ǵa artty», - dedi Ulttyq bank tóraǵasynyń orynbasary.
Saýda boiynsha áriptes elderdiń naryǵyndaǵy turaqtylyq nátijesinde jáne munai baǵasynyń turaqtalýyna bailanysty teńge 1 aida 429,41-den 411,54-ge kúsheidi.
Sonymen qatar, mamyrdaǵy ulttyq valiýtanyń ahýalyna ishki faktorlar yqpal etti.
Birinshiden, QR Ulttyq qorynan beriletin transfert 2,7 trln teńgeden 4,77 trln teńgege artty.
Ekinshiden, eksporterlerdiń salyq túsimderin tóleý úshin shetel valiýtasyn satýy artty.
Úshinshiden, karantinge bailanysty kóptegen kásiporyndar áli de jumys istemei turǵandyqtan, ulttyq valiýtaǵa suranys azaiǵan.
Sondyqtan, Ulttyq bankke mamyrda interventsiia júrgizýdiń qajettiligi bolmady.
