Sońǵy 2 aida valiýta naryǵyndaǵy jaǵdai qubylmaly boldy, ol erkin ózgermeli baǵam jaǵdaiynda syrtqy faktorlarǵa qalypty áser etti. Bul jóninde Qazaqstan Ulttyq Bankiniń Tóraǵasy Daniiar Aqyshev Almatyda ótken brifing barysynda aitty, dep habarlaidy Baq.kz aqparat agenttigi.
Ol 26 qyrkúiektegi jaǵdai boiynsha teńgeniń aiyrbastaý baǵamy jyl basynan beri 8,3%-ǵa álsirep, bir AQSh dollary úshin 359,76 teńge bolǵandyǵyn atap ótti.
«Teńgeniń álsireýi, birinshi kezekte, syrtqy faktorlarǵa bailanysty boldy. Birinshiden, bul AQSh FRJ mólsherlemesiniń ósýi saldarynan AQSh dollarynyń damýshy elderdiń valiýtasyna qatysty jalpy nyǵaiýymen bailanysty. Jyl basynan beri Túrkiianyń ulttyq valiýtasy 62%-ǵa, Úndistanda 14%-ǵa, Qytaida 6%-ǵa álsiredi. Sonymen qosa, álemde dollarmen salystyrǵanda damýshy elderdiń ǵana emes jáne keibir damyǵan elderdiń valiýtalary da álsireýde. Avstraliiada – 8%-ǵa, Jańa Zelandiiada - 6%-ǵa, Kanadada 3%-ǵa álsiredi», – dep túsindirdi D. Aqyshev.
Ulttyq Bank Basshysy rýbl men teńgeniń ishinara bailanysy negizinen az ýaqyt ishinde bolǵanyna qaramastan uzaq merzimdi kezeńde teńgeniń aiyrbastaý baǵamy kóbinese Qazaqstannyń tólem balansynyń jai-kúiimen aiqyndalatynyn atap ótti, ol barlyq faktorlar jiyntyǵynyń is-qimylyn kórsetedi.
«Teris áser etken ekinshi faktor – keleshekte Reseige qarsy sanktsiialardyń qatańdaýy týraly habarlama. Osynyń aiasynda Resei rýbliniń álsireýi jyl basynan bastap 15 % qurady. Bizdiń baǵalaýymyz boiynsha Resei naryǵynda keleshekte teris oqiǵalardy kútý kóbinese psihologiialyq turǵydan áser etkenine basty nazar aýdarǵym keledi, óitkeni Reseidiń tólem balansynyń irgeli faktorlary Resei rýbliniń álsireýine sebeptiń joq ekenin kórsetedi», – deidi D. Aqyshev.
Sonymen qatar, D. Aqyshev halyqqa jáne kásiporyndarǵa aiyrbastaý baǵamynyń qubylmalylyǵy talaptarynda qajettilik bolmasa aktivterdi bir valiýtadan basqasyna aýdarmaǵan jón ekenin atap ótti. Baǵa belgileý sheginde valiýta satyp alý jinaq aqshany joǵaltý táýekelin ulǵaitady.
