Mereke kúnderi syrtqy naryqta jaǵdaidyń qalai qalyptasqanyn jáne demalys kúnderinen keiin teńgeniń álsireýi týraly Ulttyq banktiń monetarlyq operatsiialar departamentiniń direktory Nurjan Tursynhanov aityp berdi, dep habarlaidy QazAqparat.
Onyń aitýynsha, ulttyq valiýtaǵa syrtqy faktorlar teris áser etedi. Onyń ishinde negizgisi - munai baǵasynyń joǵary qubylmaldylyǵy.
«Saýd Arabiiasy bastaǵan OPEK+-ke qatysýshy elder BAÁ-niń bazalyq óndirý deńgeiin táýligine 3,2 mln barrelden 3,8 mln barrelge qaita qaraý týraly talaptaryna bailanysty biylǵy jylǵy tamyz–jeltoqsan aralyǵynda munai óndirý kólemin bir aida 400 myń barrelge arttyrý týraly ymyraǵa kele almady.
Saýd Arabiiasy energetika ministriniń málimdemesi boiynsha, OPEK+ alians BAÁ-ǵa arnalǵan qaǵidalardan erekshe jaǵdai jasai almaidy. Ymyraǵa kelmeý tamyz aiynda kútiletin óndiristiń ulǵaiýynyń bolmaitynyn bildiredi, nátijesinde Brent markaly munai baǵasy 2018 jylǵy qazannan bastap alǵash ret bir barrel úshin 77 AQSh dollarynan asty.
Sonymen qatar, ol investorlardyń jahandyq táýekel-sentimenti nasharlaýy teńgege qysym kórsetetin qosymsha faktor bolǵanyn jetkizdi.
«Atap aitqanda, Covid-19 delta-shtammy taralýyna bailanysty qaýiptený ósti. Máselen, Aziianyń keibir elderi karantin sharalaryn qaitadan qatańdatýǵa májbúr boldy: Malaiziiada lokdaýn uzartyldy, Indoneziiada saýda ortalyqtary ýaqytsha jabyldy,Tailandta meiramhanalardyń jumysy shekteldi.
Nátijesinde, damýshy naryqtardyń kóbi úshin aptanyń basy jaǵymsyz boldy: Braziliia realy 2,8%-ǵa álsiredi, Resei rýbli 1,6%-ǵa, Meksika pesosy 1,2%-ǵa, Ońtústik Afrika randy 0,6%-ǵa álsiredi. Álemdik qor indeksteri de teris serpin kórsetýde (S&P 0,2%-ǵa, Dow Jones 0,6%-ǵa tómendedi), qaýipsiz aktivterge suranys ósýde – altyn aptanyń basynan beri 0,6%-ǵa ósti (troi ýntsiiasy úshin $1797,96-ǵa deiin), dollar indeksi (DXY) 0,3%-ǵa, Japon ienasy 0,4%-ǵa nyǵaidy»,- deidi Ulttyq bank ókili.
Munai baǵasynyń turaqsyz serpini, jańa shtamdardyń taralýy men Covid-19 pandemiiasy EM valiýtalaryna, onyń ishinde teńgege qysym kórsetýin jalǵastyrýda.
«Ulttyq bank syrtqy naryqtardaǵy ahýalǵa monitoring júrgizýdi jalǵastyrýda, turaqsyzdandyratyn jáne alaiaqtyq qubylmalylyq jaǵdaiynda valiýtalyq óktemdilik júrgizý quqyǵyn saqtaýda»,-deidi Nurjan Tursynhanov.
Aita keteiik, búgin AQSh valiýtasy 2,60 teńgege qymbattady.
