QR Ulttyq banki tóraǵasynyń orynbasary Áliia Moldabekova ulttyq valiýtanyń baǵamyna yqpal etetin syrtqy faktorlar týraly aitty, dep habarlaidy QazAqparat.
«Munai naryǵy qulady. Onyń artynan qarjy naryǵy da qulady. Munyń barlyǵyna koronavirýs juqpasy áser etti. Sońǵy 30 jylda OPEK+ kiretin elderdiń arasynda qara altyndy óndirý týraly ózara kelisimniń bolmaýy da yqpalyn tigizdi. Munai baǵasynyń birden túsýi ulttyq valiýtanyń álsireýine ákeldi. Syrtqy syn-qaterlerge jaýap retinde Ulttyq bank 10 naýryzda bazalyq stavkany 12 paiyzǵa deiin túsirgen bolatyn. Búgin Ulttyq bank bazalyq stavkany 12 paiyz dárejesinde ustap, teńgeni jańa makroekonomikalyq ahýalǵa beiimdeitindigin málimdedi», - dedi Á.Moldabekova.
Laýazymdy tulǵa Ulttyq banktiń valiýtalyq naryqqa nege qatyspaityndyǵyn, budan ári interventsiia jasamaityn sebebin túsindirdi.
«Ótken aptada syrtqy naryqtaǵy ahýaldy muqiiat baqyladyq. Teris tendentsiialar qanshalyqty turaqty bolatynyn baqyladyq. Naryqtyń quldyraý protsesi toqtar emes», - dedi ol.
Búginde munai barreliniń baǵasy 31 dollarǵa jetken.
Koronavirýs pandemiiasy, Qazaqstandaǵy tótenshe jaǵdai rejimi, OPEK+ elderi arasyndaǵy ýaǵdalastyqtyń joqtyǵy, damýshy jáne munai eksporttaýshy elder valiýtasynyń quldyraýy jaǵdaidy tek nasharlata tústi.
«Memleket basshysy aitqandai, másele búkil álemniń ekonomikasynyń qaita formattalýynda bolyp otyr. Bul tek syrtqy ahýal ǵana emes, ishki fýndamentaldy faktorlardyń nasharlaýy bolsa kerek. Bul jańa ekonomikalyq ahýalǵa Qazaqstan beiimdelýi kerek. Ótken aptada júrgizgen interventsiia barysynda eń aldymen makroekonomikalyq turaqtylyq jaily oiladyq. Negizsiz alypsatarlyqtyń aldyn alýǵa tyrystyq», - dedi Áliia Moldabekova.
