Naýryz aiynyń qorytyndysy boiynsha teńge baǵamy 5,7 %-ǵa nyǵaiyp, bir dollar úshin 467,03 teńge boldy. Bul týraly QR Ultyq bankiniń tóraǵasy Ǵalymjan Pirmatov aitty, dep habarlaidy QazAqparat.
«Naýryzda bolǵan geosaiasi táýekelder men Resei rýbliniń joǵary qubylmalyǵy teńge baǵamyna qysym jasady. 16 naýryzda teńge baǵamy birjada 1 dollar úshin 512,17 teńgege jetti», - dedi Ulttyq bank tóraǵasy Úkimettiń búgingi otyrysynda.
Onyń aitýynsha, qarjylyq turaqtylyq táýekelderin shekteý úshin Ulttyq bank jekelegen kúnderi valiýtalyq interventsiialar júrgizdi, olardyń kólemi naýryzda 990,5 mln dollar bolǵan.
«Biýdjetke beriletin transfertter úshin Ulttyq qordan 891 mln dollardy satýy jáne kvazimemlekettik sektor sýbektileriniń 233,4 mln dollar mólsherinde valiýtalyq túsimderin satýy da teńgege qoldaý kórsetti. Teńge baǵamy naýryzda edáýir qalpyna keldi jáne ai qorytyndysy boiynsha 5,7 %-ǵa nyǵaiyp, 1 dollar úshin 467,03 teńge boldy. Ulttyq valiýta baǵamy sáýirdiń basynda nyǵaiýyn jalǵastyryp, 11 sáýirde 449,63-ti kórsetti», - dep túsindirdi Pirmatov.
