Jambyl oblysynda poiyz qaǵyp ketken jylqynyń iesi temirjol kompaniiasyna 531 myń teńge kóleminde materialdyq shyǵyndy óteýge mindetteldi, dep habarlaidy ult.kz.
Oqiǵa ótken jyldyń qarasha aiynda Otar–Shý temirjol ýchaskesinde bolǵan. Jolaýshylar poiyzy qozǵalyp kele jatqan sátte lokomotivtiń aldyna kenetten jylqy shyǵyp ketken. Mashinist dybystyq belgi berip, shuǵyl tejegishti qoldanǵanymen, soqtyǵysýdyń aldyn alý múmkin bolmaǵan.
Saldarynan elektrovoz zaqymdanyp, qalpyna keltirý jóndeýine jiberilgen. Temirjol kompaniiasy keltirilgen materialdyq shyǵyndy 531 myń teńgege baǵalaǵan.
Tekserý barysynda mamandar jylqynyń iesin anyqtady. Onyń buǵan deiin de temirjol mańynda mal jaiý qaǵidalaryn buzǵany úshin ákimshilik jaýapkershilikke tartylǵany belgili boldy.
Osyǵan bailanysty temirjol kompaniiasy Shý aýdandyq sotyna lokomotivti jóndeýge ketken shyǵyndy óndirý týraly talap aryz túsirgen.
Is materialdaryn zerdelegen sot jol-kólik oqiǵasyna mal iesiniń temirjol mańynda mal jaiý talaptaryn saqtamaýy sebep bolǵan degen qorytyndyǵa keldi.
Sot sheshimimen jylqy iesinen 531 myń teńge kólemindegi materialdyq shyǵyn, sondai-aq memlekettik baj salyǵyna jumsalǵan shyǵyn óndiriletin boldy.
