جامبىل وبلىسىندا پويىز قاعىپ كەتكەن جىلقىنىڭ يەسٸ تەمٸرجول كومپانيياسىنا 531 مىڭ تەڭگە كٶلەمٸندە ماتەريالدىق شىعىندى ٶتەۋگە مٸندەتتەلدٸ, دەپ حابارلايدى ult.kz.
وقيعا ٶتكەن جىلدىڭ قاراشا ايىندا وتار–شۋ تەمٸرجول ۋچاسكەسٸندە بولعان. جولاۋشىلار پويىزى قوزعالىپ كەلە جاتقان سەتتە لوكوموتيۆتٸڭ الدىنا كەنەتتەن جىلقى شىعىپ كەتكەن. ماشينيست دىبىستىق بەلگٸ بەرٸپ, شۇعىل تەجەگٸشتٸ قولدانعانىمەن, سوقتىعىسۋدىڭ الدىن الۋ مٷمكٸن بولماعان.
سالدارىنان ەلەكتروۆوز زاقىمدانىپ, قالپىنا كەلتٸرۋ جٶندەۋٸنە جٸبەرٸلگەن. تەمٸرجول كومپانيياسى كەلتٸرٸلگەن ماتەريالدىق شىعىندى 531 مىڭ تەڭگەگە باعالاعان.
تەكسەرۋ بارىسىندا ماماندار جىلقىنىڭ يەسٸن انىقتادى. ونىڭ بۇعان دەيٸن دە تەمٸرجول ماڭىندا مال جايۋ قاعيدالارىن بۇزعانى ٷشٸن ەكٸمشٸلٸك جاۋاپكەرشٸلٸككە تارتىلعانى بەلگٸلٸ بولدى.
وسىعان بايلانىستى تەمٸرجول كومپانيياسى شۋ اۋداندىق سوتىنا لوكوموتيۆتٸ جٶندەۋگە كەتكەن شىعىندى ٶندٸرۋ تۋرالى تالاپ ارىز تٷسٸرگەن.
ٸس ماتەريالدارىن زەردەلەگەن سوت جول-كٶلٸك وقيعاسىنا مال يەسٸنٸڭ تەمٸرجول ماڭىندا مال جايۋ تالاپتارىن ساقتاماۋى سەبەپ بولعان دەگەن قورىتىندىعا كەلدٸ.
سوت شەشٸمٸمەن جىلقى يەسٸنەن 531 مىڭ تەڭگە كٶلەمٸندەگٸ ماتەريالدىق شىعىن, سونداي-اق مەملەكەتتٸك باج سالىعىنا جۇمسالعان شىعىن ٶندٸرٸلەتٸن بولدى.
