QR Indýstriia jáne infraqurylymdyq damý ministrligi Kólik komiteti «Qazaqstan temir joly» UK» AQ magistraldyq temirjol jelisi direktsiiasynyń filialdarynda temirjoldaǵy qozǵalys qaýipsizdigin qamtamasyz etý boiynsha tekserý júrgizdi, dep habarlaidy "Ult aqparat".
Arnaiy jabdyqtar men mobildi diagnostikalyq keshendi qoldana otyryp, temirjoldar men baǵyt burmalaryn tekserý nátijesinde (tekserý qazan aiynda Qazaqstannyń barlyq óńirlerinde júrgizildi) jolaýshylar men júk poezdary júretin temirjoldarda qozǵalys qaýipsizdigine qaýip tóndiretin 1000-nan astam ereje buzý jaǵdaiy anyqtaldy.
Tekserý qorytyndysy boiynsha temirjoldardy kútip ustaý boiynsha erejebuzýshylyqtardy joiý týraly nusqamalar berildi.
Poezdar qozǵalysynyń qaýipsizdigine qater tóndiretin óreskel zańbuzýshylyqtarǵa bailanysty tekserý kezinde 127 temirjol jáne 108 baǵyt burmalaryn paidalaný toqtatyldy, 350 jyldamdyq shekteýleri berildi, sondai-aq arnaiy jyljymaly quramnyń 56 birligi paidalanýdan qalyp qoidy. Zańbuzýshylyqtardy joiǵanǵa deiin ShQO, Pavlodar, Qostanai, Qaraǵandy oblystarynda jáne basqa da oblystarda birneshe temirjoldardyń qyzmeti tolyǵymen toqtatyldy.
2020 jyldyń on aiynda temirjol kóligi sýbektileri qozǵalys qaýipsizdigin 826 ret buzdy, ol boiynsha kóliktik baqylaý qyzmetkerleri 53 mln teńgege jýyq somaǵa ákimshilik materialdar toltyrdy. Temirjol kóligindegi qozǵalys qaýipsizdiginiń jai-kúiin taldaý ótken jyldyń uqsas kezeńimen salystyrǵanda ereje buzý áreketteriniń óskenin kórsetti: 2019 jyly 808 buzýshylyq tirkeldi.
«Qozǵalys qaýipsizdigi máseleleri QR IIDM Kólik komitetiniń erekshe baqylaýynda ekenin atap ótý qajet. Baqylaý temirjol kóligindegi qozǵalys qaýipsizdigin, jyljymaly quramnyń saqtalýyn qamtamasyz etý, sondai-aq sanitarlyq-karantindik rejimdi eskere otyryp, temirjol kóliginiń qaýipsizdigin arttyrýǵa baǵyttalǵan is-sharalar josparyn oryndaý maqsatynda júrgiziledi. Eger siz temirjol kóliginde qozǵalys qaýipsizdiginiń buzylýyna jol berilgenine kýá bolsańyz, bul týraly QR IIDM Kólik komitetiniń +7 7080880800 WhatsApp-nómirine habarlańyz»,-delingen habarlamada.
