QR Memlekettik qyzmet isteri jáne sybailas jemqorlyqqa qarsy is-qimyl agenttigi úsh ailyq tekseristiń nátijesin jariialady. Oǵan sáikes, temirjolmen jolaýshylardy tasymaldaý salasynda bes birdei oblysty qamtyǵan qylmystyq sxema áshkerelendi, dep xabarlaidy QazAqparat tilshisi.
Sybailas jemqorlyqqa qarsy is-qimyl ulttyq biýrosy tóraǵasynyń orynbasary Shyńǵys Qabdollanyń aitýynsha, atalǵan sxema boiynsha kóliktik baqylaý inspektsiiasy, «Qazaqstan temirjoly» AQ-sy men jelilik politsiianyń laýazymdy tulǵalary turaqty túrde zańsyz aqsha alyp otyrǵan.
Arnaiy operatsiia Aqmola, Qaraǵandy, Pavlodar oblystary, Astana men Shymkent qalalarynda uiymdastyryldy.
«Sonyń nátijesinde 50-den astam paraqor anyqtaldy. Olardyń ishinde «Qazaqstan temirjoly» AQ-synyń 31 qyzmetkeri bar. 3 revizor, kóliktik baqylaý qyzmetiniń 3 ókili, jekemenshik tasymaldaýshylardyń 9 jumyskeri, 6 vokzal kezekshisi, 2 jelilik politsei, 6 alypsatar jáne taǵysyn taǵy. Máselen, alypsatarlardyń kóbisi - qylmystyq sxemaǵa qatysqandardyń týystary. Olar aqshany jinap otyrǵan. Al poiyz brigadirleri men jolserikteri tekseristen qutylý úshin aqshany berip turdy. Zańsyz syiaqynyń kólemi 8-40 myń teńgeniń ainalasynda bolǵan», - dedi Sh.Qabdolla.
Arnaiy operatsiia kezinde qolǵa túskenderdiń bári para bergenderin moiyndady. Olardyń sózine qaraǵanda, poiyzdyń aqshasy jinalmasa, joǵarydan tekserister jiberiledi. Ondaida aiyppuldar kóptep salynady. Odan da para berip qutylǵany artyq. Osylaisha, kúnde bir poiyzdan 100 myń teńge jinalyp turady. Bir aidyń ishinde atalǵan soma 3 millionǵa deiin barady. «Bundai «alym-salyqtar» kúnde jinalady. Sonyń saldarynan xalyqqa qyzmet kórsetý sapasynyń nasharlaityny belgili», - dep atap kórsetti Sh.Qabdolla.
Aita keteiik, búgin QR Memlekettik qyzmet isteri jáne sybailas jemqorlyqqa qarsy is-qimyl agenttigi temirjol stansalarynyń basshylaryn ustaý kezindegi videony da jariialady.
