Jolaýshylar poiyzdarynyń jyljymaly quramynyń soqtyǵysýyna ákelgen oqiǵalardy tekserýdi ýákiletti organnyń quzyretine berý usynylady.
Bul týraly Májiliste zańnamalyq aktilerge kólik máseleleri boiynsha ózgerister engizý týraly zań jobasyn tanystyrý kezinde QR Indýstriia jáne infraqurylymdyq damý vitse-ministri Berik Kamaliev aitty, dep habarlaidy QazAqparat.
«Birqatar túzetý temirjol jáne sý kóligindegi qozǵalys qaýipsizdigin arttyrýǵa baǵyttalǵan. Qazirgi ýaqytta temirjol kóligindegi apattar men avariialardy tergeýdi kólik salasyndaǵy ýákiletti organ, al oqiǵalar men kólik qaqtyǵysty tasymaldaý protsesine qatysýshylardyń ózderi júrgizedi.
Adamdardyń ómiri men densaýlyǵynyń qundylyǵyn eskere otyryp, zań jobasy aiasynda jolaýshylar poiyzdarynyń jyljymaly quramynyń túsýine nemese soqtyǵysýyna ákelgen oqiǵalardy tekserýdi ýákiletti organnyń quzyretine berý usynylady. Sondai-aq, ýákiletti organnyń quzyretine Kaspii teńiziniń aýmaqtyq sýlarynda Qazaqstan Respýblikasy Memlekettik týy astynda júzetin kemelerge qatysty bolǵan avariialyq jaǵdailardy tergeýdi qosý usynylady», - dedi vitse-ministr zań jobasyn tanystyrý kezinde.
Budan buryn habarlanǵandai, júkterdi avtomobilmen tasymaldaýdyń joǵary qarqyndylyǵy jol tóseminiń merziminen buryn buzylýyna jol bermeý boiynsha túbegeili sharalardy qabyldaýdy talap etedi.
Joldarda kólik quraldarynyń salmaqtyq jáne gabarittik parametrlerin ólsheitin avtomattandyrylǵan stantsiialardy ornatý josparlanýda. Zań jobasynda ólsheý stantsiialaryn ornatý jáne olardyń jumys isteý tártibin aiqyndaityn normalar kózdelgen.
