Jazýshy-jýrnalist Arman Álmenbet Temirtaý qalasyna kiretin burylysta turǵan "SSSR tańbasyn" alyp tastaýdy surap, Qaraǵandy oblystyq máslihattyń depýtaty Bekzat Altynbekovke ashyq hat jazdy. Áleýmettik jelide jariialanǵan hatqa kópshilik pikir qaldyryp, qoldaý bildirýde. Ashyq hattyń tolyq mátinin oqyrman nazaryna usynamyz.
Qaraǵandy oblystyq máslihattyń depýtaty Bekzat Altynbekovke
Ashyq hat
Qurmetti Bekzat Qomaruly!
Qaraǵandy oblysynda, onyń ishinde Qaraǵandy qalasynyń ózinde KSRO kezinen ózge ult ókilderi kóp shoǵyrlanǵany belgili. Sonyń yzǵary bolsa kerek, áli kúnge deiin kóp kóshelerdiń aty aýyspai keledi. Táýelsiz elimizge qatysy joq adamdardyń eskertkishin ortalyqtan yǵystyrsa da, birjola alyp tastaǵan joq. Biraq jalpy alǵanda Qaraǵandy qalasynda kózge kórinetin jerler qazaqylanyp boldy deýge bolady. Bizdiń aitqymyz kelip otyrǵany qala syrtyndaǵy jáitter.
Atap aitqanda, áńgime Qaraǵandydan Astanaǵa qarai shyqqanda kózge shalynatyn bir belgi týraly. Ol - Temirtaý qalasyna kiretin burylysta turǵan SSSR tańbasy (KSRO demei, ádeii SSSR dep alyp otyrmyz).
Jer betinen SSSR joiylǵaly 27 jyl ótse de, bizdiń Temirtaýda onyń tańbasy tur. Elbasy jumys istegen Temirtaý dep maqtanǵanda aldymyzǵa jan salmaimyz. Asa qurmetti Elbasy - Qazaqstan Respýblikasynyń Prezidenti. Biz ol kisiniń SSSR kezinde jasaǵan eńbegin de qazaq úshin, bolashaq Qazaqstan úshin jasaldy dep qaraimyz. Keiingi urpaq solai qabyldaityn bolady. Olai bolsa, Temirtaýdaǵy tańbany osy ýaqytqa deiin alyp tastamai otyrǵanymyz qanshalyqty qisynǵa keledi?
Qaraǵandy-Astana tas joly memlekettik mańyzy bar Almaty-Astana tas jolynyń bir bóligi. Bul qazirgi ýaqytta elimizdiń ońtústigi men soltústigin (ońtústik kórshilerimiz ben soltústik kórshilerimizdi de) jalǵap jatqan birden bir kúre jol. Kún saiyn júzdegen, bálki myńdaǵan kólik ótedi. Dos bar, dushpan bar - bári Qazaqstannyń bir kezde bodan bolǵanyn eske salyp turatyn osy tańbany kóredi degen sóz. Bul bizdiń namysymyzǵa timei me?
Ras, SSSR degen jaqsy bolsyn, jaman bolsyn, qazaqtyń basynan ótken bir dáýir. Ol kezdegi úkimettiń qazaqqa tigizgen paidasy da boldy. Ony biz joqqa shyǵarmaimyz. Ári-beriden soń, búgin kózi tiri kóp adamnyń jastyq jaǵy sol dáýirde ótti. Sondyqtan biz dál qazir ol ýaqytty qaralaýdy maqsat etip otyrǵan joqpyz. Biraq eki aqiqat bar. Birinshisi, SSSR kezinde qazaqtyń qyrylǵany, rýhani jaǵynan keri ketkeni. Ekinshisi, qazaq SSSR-dyń quramynda táýeldi el bolǵany. Bunyń ekeýi de maqtanatyn nárse emes. Sol úshin SSSR-dyń tańbasyn el kórinetin jerge eskertkish retinde qaldyrýǵa bolmaidy dep bilemiz (osy ýaqytqa deiin sondai syltaýmen qaldyryp kele jatqan bolsa kerek). Tarihtyń kýási mýzeide turǵany lázim.
Qurmetti Bekzat Qomaruly. Ziialy orta sizdi eljandy azamat dep biledi. Basqa depýtattarǵa qaraǵanda el ishinde kóp júresiz. Sol sebepti de osy datty sizge qarata aityp otyrmyz. Oblystyń máslihat depýtaty retinde osy tańbany alyp tastaýǵa kúsh salsańyz. Bilýimizshe, Qaraǵandy qalasynyń mańyndaǵy eldi mekenderde taǵy da osyndai birneshe tańba bar kórinedi. Onyń bári qalalyq jáne oblystyq arhitektýra bóliminde bar da shyǵar. Solardyń biri qalmai kelmeske ketetin ýaqyt keldi. Áldeqashan kelgen. Endi eshten kesh jaqsy dep, shetinen tazalaý kerek. Sizden jáne áriptesterińizden sheshimtal áreket kútemiz. Basqa da depýttar men memlekettik qyzmetker qoldaidy dep senemiz.
Al osy ashyq hatty oqyǵan kisiler bizdiń ótinishti qoldaityn bolsa, pikirge aty-jónderin, qyzmetterin jazyp ketse eken.
Qurmetpen, jas jazýshy Arman Álmenbet
