Foto: Instagram.com
Almatynyń «Qairat» klýbynyń qaqpashysy Temirlan Anarbekov ÝEFA Chempiondar ligasynyń 2025/26 maýsymyndaǵy jalpy kezeń qorytyndysy boiynsha úzdik bes qaqpashynyń qataryna endi, dep habarlaidy Ult.kz.
Sports.kz málimetinshe, Temirlan Anarbekov Chempiondar ligasynda ótkizgen alty matchta 36 seiv jasap, 13 gol jibergen jáne bir oiynda qaqpasyn «qurǵaq» saqtaǵan. Osy kórsetkishteri boiynsha ol úshinshi oryndy Argentina quramasynyń ókili, «Marsel» klýbynyń qaqpashysy Heronimo Rýlimen bólisip otyr.
Qaqpashylar reitinginiń kóshin «Býdio-Glimt» klýbynyń golkiperi Nikita Haikin bastap tur. Ol segiz matchta 49 seiv jasap, 15 gol jibergen. Ekinshi orynda madridtik «Realdyń» qaqpashysy Tibo Kýrtýa ornalasqan. Onyń enshisinde jeti oiynda 41 seiv, 9 jiberilgen gol jáne eki «qurǵaq» match bar. Al úzdik bestikti Praganyń «Slaviia» komandasynyń ókili Indrjih Stanek túiindedi — segiz kezdesýde 34 seiv (onyń biri penaltiden), 16 gol jáne bir «sýhoi» oiyn.
Aita keteiik, Temirlan Anarbekov Chempiondar ligasynyń jalpy kezeńindegi alǵashqy eki týrdy jaraqatyna bailanysty ótkizip alǵan. Sol kezde «Qairat» qaqpasyn Sherhan Qalmurza qorǵaǵan bolatyn.
