Foto: Kazfootball.kz
Qazaqstan quramasy men almatylyq «Qairat» klýbynyń qaqpashysy Temirlan Anarbekov bir matchtaǵy ortasha seivter sany boiynsha Chempiondar ligasynda úzdik nátije kórsetti, dep habarlaidy Ult.kz.
Liganyń resmi saitynda jariialanǵan statistikaǵa sáikes, 22 jastaǵy qaqpashy biylǵy maýsymda tórt matchta 27 seiv jasaǵan.
Jalpy seiv sany boiynsha Anarbekov kiprlik «Pafos» komandasynyń ókili Neofitos Mihailmen birge 4-oryndy bólisip tur. Al reitingtiń kóshbasshysy — norvegiialyq «Býde-Glimt» klýbynyń qaqpashysy Nikita Haikin (38 seiv).
Aita keteiik, Anarbekovten joǵary turǵan Haikin, Rýli men Kýrtýa týrnirde odan kóp match ótkizgen. Sondyqtan olar ortasha kórsetkish boiynsha qazaqstandyq qaqpashydan tómen tur.
Chempiondar ligasyndaǵy eń úzdik qaqpashylar (ortasha seiv sany boiynsha):
-
Temirlan Anarbekov («Qairat») — matchyna 6,75 seiv (4 match)
-
Nikita Haikin («Býde-Glimt») — 6,3 seiv (6 match)
-
Tibo Kýrtýa («Real») — 5,9 seiv (5 match)
-
Heronimo Rýli («Marsel») — 5,5 seiv (6 match)
-
Iindrjih Stanek («Slaviia») — 5,5 seiv (4 match)
Reitingke «Qairat» qaqpashysy Sherhan Qalmurza (2 matchta 11 seiv) jáne «Aintraht» oiynshysy Kaýan Santos (bir matchta 7 seiv) engizilmegen, sebebi olar komandasynyń Chempiondar ligasyndaǵy oiyndarynyń jartysynan azyn ótkizgen.
Temirlan Anarbekov — Chempiondar ligasynyń úzdik oiynshysy
Statistikalyq portal Sofascore.com da biylǵy maýsymda qazaqstandyq qaqpashyny týrnirdiń eń úzdik oiynshysy dep atady. Portal match saiyn baǵa qoiyp otyrady, jáne Anarbekovtiń ortasha reitingi — 8,9, bul kez kelgen basqa oiynshydan joǵary.
Salystyrý úshin, Chempiondar ligasynyń úzdik surmergeni Kilian Mbappeniń ortasha baǵasy — 8,34.
Eske salaiyq, Chempiondar ligasynyń sońǵy matchynda Temirlan Anarbekov «Qairat» — «Olimpiakos» kezdesýinde 8 seiv jasap, oiynnyń úzdigi atandy. ÝEFA onyń eki seivin týr kúniniń eń myqty qutqarýlary qataryna engizdi.
