QR Memlekettik qyzmet isteri agenttiginiń tóraǵasy Anar Jaiylǵanova temeki tuqylyn laqtyrǵan Qarasai ákimdigi qyzmetkeriniń isin jaýapty departament tekserip jatqanyn málim etti, dep habarlaidy "Ult aqparat".
Eske sala ketsek, buǵan deiin Almaty oblysy Qarasai aýdany ákimdiginiń mamany jeli qoldanýshylardyń narazylyǵyn týǵyzǵany týraly aqparat taraǵan edi. Jelige taraǵan videodan turǵyndardyń er azamatqa shaǵymyn aityp, narazylyq bildirip jatqanyn kórýge bolady. Sol sátte temegi shegip turǵan ol temeki tuqylyn jerge laqtyra salady. Turǵynnyń biri onyń áreketine ashýlanyp, «balalar alańyna temeki tuqylyn laqtyryp, etikany saqtamadyń» dep shúiligedi.
Beiádep qylyq kórsetken adam Qarasai aýdany ákimdiginiń turǵyn úi kommýnaldyq sharýashylyǵy bóliminiń mamany bolyp shyqqan.
Memlekettik qyzmetshiniń bul qylyǵyna bailanysty videodan Anar Jaiylǵanova habardar ekenin málim etti.
«Iá, biz bul oqiǵadan habardarmyz. Bizde memlekettik qyzmet salasyn baqylaý jónindegi departament bar. Bul departament atalmysh máselemen ainalysyp jatyr. Ol aqparat búgin shyqty. Biz de ol máselemen jumys júrgizemiz», - dedi Anar Jaiylǵanova.
