Saýda jáne integratsiia ministri Baqyt Sultanov temeki men alkogoldik ónimderdi satyp alý kezinde qujatty kórsetý talaptaryn túsindirdi, dep habarlaidy "Ult aqparat".
Ortalyq kommýnikatsiialar qyzmetindegi baspasóz máslihatynda ministrden QR Halyq densaýlyǵy jáne densaýlyq saqtaý júiesi týraly kodeksine engizilgen keibir ózgertýlerden keiin temeki satyp alý kezinde satyp alýshy qandai áreketter jasaýy tiis ekendigi suraldy.
«Kodekske temeki men alkogoldik ishimdikti satyp alatyndardy azaitýǵa yqpal etý boiynsha sharalarǵa bailanysty ózgertýler engizildi. Ásirese, kámeletke tolmaǵandardy osy ónimnen shettetý eskerilgen. Sondyqtan tiisti norma paida boldy. Joǵary deńgeidegi zańnamalyq aktilerge engizilgen kez kelgen ózgerister jalpy sipatqa ie, al keiinnen zańǵa táýeldi normativtik quqyqtyq aktiler (Úkimet qaýlysy men ministrlikter buiryqtary) túsiniktemelik ári naqtylaýshy sipatta bolady. Osy oraida bizdiń buiryqqa ózgertýler engizý boiynsha jumysty atqardyq, iaǵni bul qadamdar satýshylarǵa osy normany paidalanýdyń mán-jaiyn túsindirý úshin iske asyryldy. Sáikesinshe, satýshylarǵa naqty túsindirý sharalary jasaldy. Jeke kýálik satyp alýshynyń jasyna qatysty kúmán bolǵanda ǵana talap etiledi», - dedi Baqyt Sultanov.
