Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine densaýlyq saqtaý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasy aǵymdaǵy jylǵy 4 naýryzda birinshi oqylymda maquldandy.
Zań jobasyn talqylaý barysynda depýtattar birqatar usynystar men tolyqtyrýlar engizdi. Atap aitsaq:
- Ákimshilik quqyq buzýshylyq týraly kodekske ákimshilik jaýaptylyqty kúsheitýge baǵyttalǵan túzetýler engizildi;
- Vaktsinalardyń sapasyn arttyrý maqsatynda adam densaýlyǵyna ziian keltirgen jaǵdaida, vaktsinalardy ákelý, satyp alý, tasý, saqtaý qaǵidalaryn buzǵany úshin 100-den 1000 ailyq eseptik kórsetkishke deiingi mólsherde ákimshilik aiyppuldar belgilendi;
- Meditsina qyzmetkerleriniń mártebesin arttyrý maqsatynda meditsina jáne farmatsevtika qyzmetkerleriniń kásiptik qyzmetine zańsyz aralasqany úshin ákimshilik aiyppul mólsheri jeke tulǵalarǵa 7-den 50-ge deiin, laýazymdy adamdarǵa 20-dan 75-ke deiin, zańdy tulǵalarǵa 75-ten 150 ailyq eseptik kórsetkishke deiin ulǵaityldy.
«Sonymen birge, kámeletke tolmaǵandarǵa temeki jáne temeki buiymdaryn satqany úshin, temeki buiymynyń markasy bar taýarlardy qasaqana taratqany, kórmege qoiǵany nemese satqany úshin ákimshilik aiyppuldar eki ese ulǵaityldy. Al temeki jáne temeki buiymdaryn satý jónindegi zańnama talaptaryn, olardy belgilenbegen oryndarda tutynýǵa salynǵan tyiymdy buzǵany, zańsyz jarnamalaǵany úshin ákimshilik aiyppuldardyń mólsheri 30-50%-ǵa ulǵaityldy. Avtomobil kólik quralynda balalar bolǵan kezde onda temeki buiymdaryn tutynǵany úshin 10-nan 20 ailyq eseptik kórsetkishke deiin aiyppul kózdelip otyr», - dedi depýtat Záýresh Amanjolova zań jobasy boiynsha baiandamasynda.
Budan buryn habarlanǵandai, Parlament Májilisiniń jalpy otyrysynda «Halyq densaýlyǵy jáne densaýlyq saqtaý júiesi týraly» Qazaqstan Respýblikasy Kodeksiniń jobasy ekinshi oqylymda maquldandy.
Qujat aiasynda Qazaqstanda 21 jasqa deiin temeki satyp alýǵa tyiym salynady.
