QR Ishki ister ministrligi «Avtobýs» jedel aldyn alý sharasyn ótkizip, on myńnan astam jol erejesin buzý faktisin anyqtady. Bul týraly ministrliktiń resmi ókili Nurdildá Oraz aityp berdi, dep habarlaidy QazAqparat.
«Úsh kúndik reid barysynda avtobýs júrgizýshileriniń 10 myńǵa jýyq jol erejesin buzý faktisi anyqtaldy. Mas kúiinde avtobýs aidaǵan 15 júrgizýshi tirkeldi. Barlyq júrgizýshiler kólik júrgizý quqyǵynan aiyrylatyn bolady. Jolaýshylardy tasymaldaý kezinde 1700-den astam avtobýs júrgizýshisi telefon paidalanǵan. 300-ge jýyǵy jyldamdyqty mólsherden tys arttyryp, ainalasyna qaýip tóndirgen. Budan basqa eńbek jáne demalys rejimin buzýdyń 43 faktisi, tehnikalyq tekserýden ótpegen, zańsyz qaita jabdyqtalǵan bir myńnan astam avtobýs, jyldamdyqty arttyrýdyń 300-ge jýyq faktisi anyqtaldy», - dedi Nurdildá Oraz áleýmettik jelide ótken onlain brifingide.
Shara nátijesinde avtobýs parkteri basshylary qatarynan 126 laýazymdy tulǵa ákimshilik jaýapkershilikke tartyldy. Eki avtoparktiń litsenziialary toqtatyldy. 292 kólik quraly aiyppul turaǵyna qoiyldy.
Sonymen birge, resmi ókil bir aptada jalpy sany 3424 qylmys tirkelgenin atap ótti. Politseilerdiń jedel áreket etýi nátijesinde 2198 qylmys izi sýymai ashyldy. Onyń ishinde19 adam óltirý, 38 tonaý jáne 513 urlyq faktileri áshkere boldy.
Bir aptada jalpy sany 209 jol-kólik oqiǵasy oryn aldy, saldarynan ókinishke qarai 40 adam qaza taýyp, 235 adam jaraqat aldy.
